|
സമന്സ് വാസ്തവമെന്നു നരേന്ദ്ര മോഡി
ന്യൂഡല്ഹി : തനിക്കെതിരെ പ്രത്യേക അന്വേഷണ സംഘം സമന്സ് പുറപ്പെടുവിച്ചു എന്ന വാര്ത്ത നേരത്തെ നിഷേധിച്ച ഗുജറാത്ത് മുഖ്യ മന്ത്രി നരേന്ദ്ര മോഡിയുടെ അഭിഭാഷകന് സമന്സ് ലഭിച്ചുവെന്ന വാര്ത്ത സത്യമാണെന്ന് സമ്മതിച്ചു. എന്നാല് തനിക്കെതിരെ പ്രത്യേക അന്വേഷണ സംഘം നടത്തുന്ന അന്വേഷണത്തിന്റെ നിയമ സാധുത ചോദ്യം ചെയ്തു കൊണ്ട് സുപ്രീം കോടതിക്ക് മുന്പില് ബി.ജെ.പി. എം.എല്.എ. കാലു ഭായ് ഹരജി സമര്പ്പിച്ചിട്ടുണ്ട് എന്നാണ് ഇത് സംബന്ധിച്ച് മോഡിയുടെ പ്രതികരണം. ഈ ഹരജിയിന്മേല് ഏപ്രില് 5ന് സുപ്രീം കോടതി വാദം കേള്ക്കാനിരിക്കെ ഇപ്പോഴത്തെ സമന്സ് അസാധുവാണ് എന്നാണ് മോഡിയുടെ നിലപാട്. എന്നാല് പ്രത്യേക അന്വേഷണ സംഘത്തിന് തങ്ങളുടെ അന്വേഷണവുമായി മുന്പോട്ട് പോകുന്നതില് തെറ്റില്ല എന്നാണ് തോന്നുന്നതെങ്കില് മാര്ച്ച് 27നു സംഘത്തിന് മുന്പില് ഹാജരാകാന് മുഖ്യ മന്ത്രി തയ്യാറാണെന്ന് മോഡിയുടെ അഭിഭാഷകനായ മഹേഷ് ജെട്മലാനി അറിയിച്ചു.
Labels: കുറ്റകൃത്യം, തീവ്രവാദം
- ജെ. എസ്.
( Wednesday, March 24, 2010 ) |
|
മഹമൂദ് അല് മബ്ഹൂവ് കൊല; 11 പേരെ തിരിച്ചറിഞ്ഞുവെന്ന് ദുബായ് പോലീസ്
 ദുബായ് : ഹമാസ് നേതാവ് മഹമൂദ് അല് മബ്ഹൂവ് ദുബായില് കൊല്ലപ്പെട്ടതുമായി ബന്ധപ്പെട്ട് 11 പേരെ തിരിച്ചറിഞ്ഞി ട്ടുണ്ടെന്ന് ദുബായ് പോലീസ് മേധാവി ലെഫ്റ്റന്റ് ജനറല് ദാഹി ഖല്ഫാന് തമീം അറിയിച്ചു. ആറ് ബ്രിട്ടീഷുകാരും ഒരു ഫ്രഞ്ച് കാരനും ഒരു ജര്മന് കാരനും ഒരു സ്ത്രീ ഉള്പ്പടെ മൂന്ന് ഐറിഷ്കാരുമാണ് കൊലപാതകത്തില് പങ്കാളികളായത്. കൊലപാതകം നടത്തിയ ശേഷം ഇവര് വിവിധ യൂറോപ്യന് രാജ്യങ്ങളിലേക്ക് കടക്കുകയായിരുന്നു. ഇവരെ പിടികൂടാനായി ഇന്റര്പോളിന്റെ സഹായം തേടിയിട്ടുണ്ടെന്നും ദാഹി ഖല്ഫാന് അറിയിച്ചു. വീഡിയോ കടപ്പാട് : ഗള്ഫ് ന്യൂസ് ദിനപത്രം വീഡിയോ കടപ്പാട് : ഗള്ഫ് ന്യൂസ് ദിനപത്രം വീഡിയോ കടപ്പാട് : ഗള്ഫ് ന്യൂസ് ദിനപത്രം ജനുവരി 20 ന് ദുബായ് വിമാനത്താവളത്തിന് അടുത്തുള്ള ഒരു ഹോട്ടലിലാണ് മഹമൂദ് അല് മബ്ഹൂവിനെ കൊല്ലപ്പെട്ട നിലയില് കണ്ടെത്തിയത്. Dubai police issues arrest warrant against suspected murderers of Mahmoud Al Mabhouh Labels: കുറ്റകൃത്യം, പോലീസ്
- സ്വന്തം ലേഖകന്
( Monday, February 15, 2010 ) |
|
ഇന്ത്യന് ഹാക്കര്മാര് ഓസ്ട്രേലിയക്കെതിരെ യുദ്ധത്തില്
 മെല്ബണ്: ഓസ്ട്രേലിയയില് ഇന്ത്യന് വിദ്യാര്ത്ഥികള്ക്ക് നേരെ നടക്കുന്ന അക്രമത്തിന് പ്രതികാരം എന്നവണ്ണം ഒരു കൂട്ടം ഇന്ത്യന് ഹാക്കര്മാര് ഓസ്ട്രേലിയക്കെതിരെ ഓണ് ലൈന് യുദ്ധത്തില് ഏര്പ്പെടുന്നു എന്ന് സൂചന. ഹാക്കേഴ്സ് യൂണിയന് ഓഫ് ഇന്ത്യ എന്ന സംഘമാണ് ഇതിനു പിന്നില് എന്നാണ് സംശയം. ഇവരുടെ ആക്രമണത്തിന് ഇരയായ ഓസ്ട്രേലിയയിലെ മെല്ബണ് നഗരത്തിലെ വ്യവസായ വ്യാപാര സ്ഥാപനങ്ങള്ക്ക് ലക്ഷക്കണക്കിന് ഡോളറിന്റെ നഷ്ടമാണ് ഉണ്ടായത് എന്ന് ഓസ്ട്രേലിയന് മാധ്യമങ്ങള് റിപ്പോര്ട്ട് ചെയ്തു. ഓസ്ട്രേലിയന് പോലീസ് അന്വേഷണം ആരംഭിച്ചിട്ടുണ്ടെങ്കിലും കൂടുതല് വിവരങ്ങള് വെളിപ്പെടുത്താന് അധികൃതര് തയ്യാറായിട്ടില്ല.രാവിലെ ജോലിക്ക് വന്ന ജീവനക്കാര് തങ്ങളുടെ കമ്പ്യൂട്ടര് സര്വര് പ്രവര്ത്തിപ്പിക്കാന് കഴിയാത്ത നിലയില് കണ്ടെത്തുകയായിരുന്നു. ഇന്ത്യന് വിദ്യാര്ഥികള്ക്ക് നേരെയുള്ള ആക്രമണം നിര്ത്തുന്നത് വരെ ഹാക്കിംഗ് തുടരുമെന്ന ഭീഷണിയും ഇവര്ക്ക് ലഭിച്ചിട്ടുണ്ട്.  ഓസ്ട്രേലിയക്കെതിരെ ഹാക്കിംഗ് യുദ്ധം ആരംഭിക്കാനുള്ള നിര്ദ്ദേശം ഹാക്കേഴ്സ് യൂണിയന്റെ വെബ്സൈറ്റില് ഓണ് ലൈന് ആയാലും നേരിട്ടായാലും ആക്രമണം അനുവദനീയമല്ല എന്നാണ് ഓസ്ട്രേലിയന് വിദ്യാര്ത്ഥി കളുടെ യൂണിയന്റെ പ്രതികരണം. ഓസ്ട്രേലിയന് തെരുവുകളുടെ സുരക്ഷിതത്വം ഇല്ലായ്മയ്ക്ക് വ്യാപാര സ്ഥാപനങ്ങള് വില കൊടുക്കേണ്ടി വരുന്നത് ശരിയല്ല എന്നും അതിനാല് ഇത്തരക്കാര് വ്യാപാര സ്ഥാപനങ്ങളുടെ നേരെയുള്ള ഓണ് ലൈന് ആക്രമണങ്ങള് തുടരരുത് എന്നും വിദ്യാര്ത്ഥി നേതാവായ ഗൌതം ഗുപ്ത അറിയിച്ചു.  ഹാക്കേഴ്സ് യൂണിയന് ഓഫ് ഇന്ത്യയുടെ വെബ്സൈറ്റ് ചിത്രത്തില് ക്ലിക്ക് ചെയ്താല് വലുതായി കാണാം എന്നാല് ആക്രമണത്തിന്റെ വാര്ത്ത പുറത്തായതോടെ ഹാക്കേഴ്സ് യൂണിയന്റെ വെബ്സൈറ്റ് താല്ക്കാലികമായി ലഭ്യമല്ലാതായി. ഈ വെബ് സൈറ്റില് നേരത്തെ ഇതിലെ അംഗങ്ങളുടെ പേരും ഫോട്ടോയും ഈമെയില് വിലാസങ്ങളും പരസ്യമായി പ്രദര്ശിപ്പിച്ചിരുന്നു. അന്വേഷണ ഉദ്യോഗസ്ഥരെ വഴി തെറ്റിക്കാനായി ഹാക്കേഴ്സ് യൂണിയന് ഓഫ് ഇന്ത്യ എന്ന പേരില് ഒരു പുതിയ വെബ് സൈറ്റും ഒരുക്കിയിട്ടുണ്ട്. Labels: ആസ്ത്രേലിയ, ഇന്റര്നെറ്റ്, ഐ.ടി, കുറ്റകൃത്യം
- ജെ. എസ്.
( Monday, February 15, 2010 ) |
|
ഹമാസ് കമാണ്ടറുടെ ഘാതകരെ ദുബായ് പോലീസ് തിരിച്ചറിഞ്ഞു
 ദുബായ് : കഴിഞ്ഞ ആഴ്ച ദുബായിലെ ഒരു ഹോട്ടല് മുറിയില് കൊല്ലപ്പെട്ട നിലയില് കണ്ട ഹമാസ് കമാണ്ടര് മഹ്മൂദ് അല് മബ്ഹൂ വിന്റെ ഘാതകരെ ദുബായ് പോലീസ് കണ്ടെത്തി. പ്രൊഫഷണല് കൊലയാളികള് ആണ് കൊല ചെയ്തത് എങ്കിലും ഇവരെ തിരിച്ചറിയാന് മതിയായ തെളിവുകള് ഇവര് അവശേഷിപ്പിച്ചിരുന്നു എന്ന് ദുബായ് പോലീസ് അധികൃതര് പറഞ്ഞു. യൂറോപ്യന് പാസ്പോര്ട്ടുകളുമായി ദുബായില് നിന്നും കടന്നു കളഞ്ഞ ഇവരെ ഇന്റര്പോളിന്റെ സഹായത്താല് പിടി കൂടാനുള്ള ശ്രമം നടക്കുന്നു.ഇസ്രയേലി ഇന്റലിജന്സ് വിഭാഗമായ മൊസാദ് ആണ് കൊലക്ക് പിന്നില് എന്ന് ഹമാസ് പറയുന്നു. ജനുവരി 19ന് ഉച്ചയ്ക്ക് 03:15ന് ദുബായില് എത്തിയ മഹമൂദിന്റെ മൃതദേഹം ജനുവരി 20 ന് ഉച്ചയ്ക്ക് ഹോട്ടല് മുറിയില് കാണപ്പെടുകയായിരുന്നു.കൊലയാളി സംഘം ഇയാളെ പിന്തുടര്ന്ന് വന്ന് കൊല നടത്തുകയായിരുന്നു എന്നാണ് നിഗമനം. ഇതിനു മുന്പ് രണ്ടു തവണ ഇയാള ഇസ്രയേലി വധ ശ്രമങ്ങളെ അതിജീവിച്ചിട്ടുണ്ട്. ആറു മാസം മുന്പ് ബെയ്റൂട്ടില് വെച്ച് വിഷം അകത്തു ചെന്ന നിലയില് 30 മണിക്കൂറോളം ബോധരഹിതനായി കിടന്നിട്ടുണ്ട് ഇയാള്. തലക്ക് വൈദ്യത പ്രഹരമേല്പ്പിച്ചാണ് കൊല നടത്തിയത് എന്നാണ് പോസ്റ്റ്മോര്ട്ടം റിപ്പോര്ട്ട്. മരിച്ചതിനു ശേഷം കഴുത്ത് ഞെരിക്കുകയും ചെയ്തു. മറൊരു പേരിലാണ് മഹ്മൂദ് ദുബായില് പ്രവേശിച്ചത്. എന്നാല് യഥാര്ത്ഥ പേരില് ഇയാള് വന്നിരുന്നുവെങ്കില് ഇയാള് ആരാണെന്ന് തിരിച്ചറിയുകയും മതിയായ സുരക്ഷിതത്വം നല്കാന് തങ്ങള്ക്ക് കഴിയുമായിരുന്നു എന്നും പോലീസ് അറിയിച്ചു. Labels: കുറ്റകൃത്യം, തീവ്രവാദം, യു.എ.ഇ.
- ജെ. എസ്.
( Saturday, January 30, 2010 ) |
|
മുത്തൂറ്റ് പോള് എം. ജോര്ജ്ജ് വധം: അന്വേഷണം സി. ബി. ഐ. ക്ക്
വ്യവസായ പ്രമുഖനായ പോള് എം. ജോര്ജ്ജിന്റെ വധം സംബന്ധിച്ച് സി. ബി. ഐ അന്വേഷണം നടത്തുവാന് ഹൈക്കോടതി ഉത്തരവായി. സംസ്ഥാന പോലീസ് നടത്തിയ അന്വേഷണത്തിലെ അപാകതകളും മറ്റു ചില ഘടകങ്ങളും ചൂണ്ടിക്കാട്ടി ക്കൊണ്ട് കൊല്ലപ്പെട്ട പോളിന്റെ പിതാവ് എം. ജോര്ജ്ജ് നല്കിയ ഹര്ജിയിലാണ് ഈ വിധിയുണ്ടായത്. ആറു മാസത്തിനകം അന്വേഷണം പൂര്ത്തി യാക്കുവാനും പറഞ്ഞിട്ടുണ്ട്. തുടക്കം മുതലേ ഈ കേസ് സംബന്ധിച്ച് ഒട്ടേറെ ദുരൂഹതകള് ഉയര്ന്നിരുന്നു. സംസ്ഥാന രാഷ്ടീയത്തിലൂം പോള് വധക്കേസ് ഏറെ കോളിളക്കം സൃഷ്ടിച്ചിരുന്നു.
- എസ്. കുമാര് Labels: കുറ്റകൃത്യം, കോടതി
- ജെ. എസ്.
( Thursday, January 21, 2010 ) |
|
ചൈനീസ് ആക്രമണം പ്രധാന മന്ത്രിയുടെ ഓഫീസിലും
 ഡല്ഹി : പ്രധാന മന്ത്രിയുടെ ഓഫീസിലും ചൈന സൈബര് ആക്രമണം നടത്തിയതായി സൂചന. എന്നാല് ഇതിനായി ചൈനീസ് ഹാക്രമികള് (ഹാക്ക് ചെയ്യുന്ന ആക്രമികള്) റഷ്യയിലെയും, ദക്ഷിണ അമേരിക്കയിലേയും, കാലിഫോര്ണിയയിലെയും ഗേറ്റ് വേകള് ആണ് ഉപയോഗിച്ചത് എന്ന് അന്വേഷണത്തില് വ്യക്തമായിട്ടുണ്ട്. പ്രധാന മന്ത്രിയുടെ ഓഫീസിലെ pmo@nic.in എന്ന ഈമെയില് വായിക്കുവാനായി ഹാക്രമികള് ശ്രമിച്ചതായും അന്വേഷണത്തില് കണ്ടെത്തിയിട്ടുണ്ട്. എന്നാല് ഈ ഉദ്യമം പരാജപ്പെട്ടു എന്നാണ് കരുതപ്പെടുന്നത്. ഇന്ത്യയുടെ സുപ്രധാന സൈനിക നയതന്ത്ര വ്യാവസായിക ശൃംഖല യുടെ ഇന്റര്നെറ്റ് അടിത്തറ ഇത്തരം സൈബര് ആക്രമണങ്ങള്ക്ക് വിധേയമാണ് എന്ന് ഇന്ത്യന് ഇന്റലിജന്സ് വൃത്തങ്ങള് വ്യക്തമാക്കുന്നു. ഇന്ത്യയോട് ശത്രുതയുള്ള രാജ്യങ്ങള് ഇത്തരം ആക്രമണങ്ങള് നടത്താനുള്ള സാധ്യത വളരെ ഏറെയാണ്. പ്രത്യേകിച്ചും ഇന്ത്യയില് സൈനികമായും, നയതന്ത്ര പരമായും, ആഭ്യന്തരമായും, ആഗോള വ്യാപാര രംഗത്തും താല്പര്യങ്ങളുള്ള ചൈന. കഴിഞ്ഞ ഏതാനും വര്ഷങ്ങള് കൊണ്ട് ചൈന സൈബര് ആക്രമണ രംഗത്ത് ഏറെ വൈദഗ്ദ്ധ്യം നേടിയിട്ടുണ്ട്. ഇതിനായി ഒരു പ്രത്യേക സൈബര് സൈന്യം തന്നെ ചൈന ഒരുക്കിയിട്ടുമുണ്ട്. 300,000 ഹാക്രമികളാണ് ഈ സൈബര് സൈന്യത്തില് ഉള്ളത് എന്നാണ് ഇന്ത്യന് ഇന്റലിജന്സ് വിഭാഗത്തിന്റെ അനുമാനം. ചൈന ഇന്ത്യയെ ആക്രമിക്കുന്നത് ഇത് ആദ്യ സംഭവമല്ല എന്നും സുരക്ഷാ ഉദ്യോഗസ്ഥര് വെളിപ്പെടുത്തുന്നു. Labels: ഇന്റര്നെറ്റ്, കുറ്റകൃത്യം, ചൈന, യുദ്ധം, രാജ്യരക്ഷ
- ജെ. എസ്.
( Saturday, January 16, 2010 ) |
|
ഷിബു സോറന് വീണ്ടും മുഖ്യമന്ത്രിയാവുന്നു
 ഡിസംബര് 30ന് നടക്കുന്ന സത്യ പ്രതിജ്ഞാ ചടങ്ങോടെ ജാര്ഖണ്ഡ് മുക്തി മോര്ച്ച നേതാവായ ഷിബു സോറന് ജാര്ഖണ്ഡിന്റെ ഏഴാമത് മുഖ്യ മന്ത്രി ആയി അധികാരത്തില് കയറും. ഗവര്ണര് കെ. ശങ്കര നാരായണനെ ഇത് സംബന്ധിച്ചു കൂടിക്കാഴ്ച്ച നടത്തിയ സോറന് തന്നെയാണ് ബുധനാഴ്ച്ച സത്യ പ്രതിജ്ഞ ചെയ്യാം എന്ന നിര്ദ്ദേശം വെച്ചത്. ബി. ജെ. പി. യും ഓള് ജാര്ഖണ്ഡ് സ്റ്റുഡന്സ് യൂണിയനുമായി (എ. ജെ. എസ്. യു.) ധാരണയിലെത്തിയ ജെ. എം. എം. ശനിയാഴ്ച്ചയാണ് ഗവര്ണറെ കണ്ട് സര്ക്കാര് രൂപീകരിക്കാനുള്ള തങ്ങളുടെ അവകാശ വാദം ഉന്നയിച്ചത്. ബി. ജെ. പി. യുടെ 18 എം. എല്. എ. മാരും എ. ജെ. എസ്. യു. വിന്റെ അഞ്ചു എം. എല്. എ. മാരും കൂടി ചേര്ന്നതോടെ 81 അംഗ സഭയില് സോറന് 45 അംഗങ്ങളുടെ പിന്തുണയായി.ലോക് സഭയില് അംഗങ്ങളായ ജാര്ഖണ്ഡ് മുക്തി മോര്ച്ചയുടെ രണ്ട് എം. പി. മാരും അറിയപ്പെടുന്ന ക്രിമിനലുകളാണ്. അവരുടെ നേതാവ് ഷിബു സോറന് ഒന്നിലേറെ കൊലപാതകങ്ങളുടെ സൂത്രധാരനും. ജാര്ഖണ്ഡ് സംസ്ഥാനത്തിന്റെ മുഖ്യ മന്ത്രിയായും ദേശീയ കാബിനറ്റ് മന്ത്രിയായും അദ്ദേഹം നേരത്തേ നമ്മെ ഭരിച്ചിരുന്നു. രണ്ട് നാള്ക്കകം അദ്ദേഹം വീണ്ടും മുഖ്യ മന്ത്രി പദത്തിലേറുകയും ചെയ്യും. മന്മോഹന് മന്ത്രിസഭയില് കല്ക്കരി മന്ത്രി ആയിരുന്ന ഷിബു സോറനെതിരെ പത്തു പേരെ കൊന്ന കേസില് അറസ്റ്റ് വാറണ്ട് പുറപ്പെടുവിച്ചതിനെ തുടര്ന്ന് അദ്ദേഹം രാജി വെയ്ക്കാന് നിര്ബന്ധിതനായി. ആദ്യം ഒളിവില് പോയ അദ്ദേഹം, പിന്നീട് അറസ്റ്റ് വരിക്കുകയും ജാമ്യത്തില് പുറത്തിറങ്ങുകയും ചെയ്തു. എന്നാല് ജാര്ഖണ്ഡിലെ തെരഞ്ഞെടുപ്പ് വേളയില് സോറനുമായി കോണ്ഗ്രസ് ധാരണയില് ഏര്പ്പെടുകയും അദ്ദേഹത്തെ വീണ്ടും മന്ത്രിസഭയില് കല്ക്കരി വകുപ്പ് തന്നെ നല്കി കൊണ്ട് തിരിച്ചെടുക്കുകയും ചെയ്തു. 2005 മാര്ച്ചില് സോറനെ ജാര്ഖണ്ഡ് മുഖ്യമന്ത്രിയായി സര്ക്കാര് രൂപീകരിക്കാന് ക്ഷണിക്കുകയുണ്ടായി. എന്നാല് ഒന്പതാം ദിവസം നടന്ന വിശ്വാസ വോട്ടെടുപ്പില് പരാജയപ്പെട്ടതിനെ തുടര്ന്ന് സോറന് രാജി വെയ്ക്കേണ്ടി വന്നു. തുടര്ന്ന് നടന്ന അസംബ്ലി തെരഞ്ഞെടുപ്പില് സോറന് വന് അതിക്രമങ്ങള് നടത്തിയെങ്കിലും തെരഞ്ഞെടുപ്പ് നീതിപൂര്വ്വമാക്കാന് കോണ്ഗ്രസ് സര്ക്കാരിന് 5 ബറ്റാലിയന് കേന്ദ്ര സേനയെ അയക്കേണ്ടി വന്നു. തെരഞ്ഞെടുപ്പില് സോറന് പരാജയപ്പെടുകയും ചെയ്തു. 2006 നവംബറില് തന്റെ പേഴ്സണല് സെക്രട്ടറിയെ കൊലപ്പെടുത്തിയ കേസില് സോറനെ കോടതി കുറ്റക്കാരനെന്നു കണ്ടെത്തുകയും സോറനെ ജീവ പര്യന്തം തടവിനായി ജയിലിലേക്ക് അയക്കുകയും ചെയ്തു. 2007 ഓഗസ്റ്റില് പക്ഷെ ഡല്ഹി ഹൈക്കോടതി പ്രോസിക്യൂഷന് വാദങ്ങള് ദുര്ബലമാണെന്ന് ചൂണ്ടിക്കാട്ടി സോറനെ വെറുതെ വിട്ടു. സോറനെതിരെയുള്ള കുറ്റം തെളിയിക്കാന് കഴിയാഞ്ഞ സി. ബി. ഐ. പ്രോസിക്യൂട്ടര് ഈ കേസ് കൈകാര്യം ചെയ്ത രീതിയെ കോടതി നിശിതമായി വിമര്ശിക്കുകയും ചെയ്തു. Shibu Soren becomes Chief Minister again Labels: കുറ്റകൃത്യം, രാഷ്ട്രീയം
- ജെ. എസ്.
( Monday, December 28, 2009 ) |
|
പ്രാണ രക്ഷയ്ക്കായുള്ള വിളി മോഡി പുച്ഛിച്ചു തള്ളി
 ഗുള്ബാഗ് സൊസൈറ്റി കൂട്ട കൊലയില് കൊല്ലപ്പെട്ട പാര്ലമെന്റ് അംഗം എഹ്സാന് ജാഫ്രി പ്രാണ രക്ഷാര്ത്ഥം സഹായത്തിനായി നരേന്ദ്ര മോഡിയെ ഫോണില് വിളിച്ചപ്പോള് മോഡി സഹായിക്കാന് നിരസിക്കുക മാത്രമല്ല ജാഫ്രിയെ അധിക്ഷേപി ക്കുകയും ചെയ്തു എന്ന് കൂട്ട കൊലയില് നിന്നും രക്ഷപ്പെട്ടയാള് കോടതിയില് സാക്ഷ്യപ്പെടുത്തി. കൂട്ട കൊല നടത്തിയ 24 ഓളം പേരെ സാക്ഷി പിന്നീട് തിരിച്ചറിയുകയും ചെയ്തു. 2002 ഫെബ്രുവരി 28ന് മൃത ദേഹങ്ങള് തിരിച്ചറിയാന് കഴിയുന്ന നിലയില് ആയിരുന്നു എന്നും എന്നാല് രണ്ടു ദിവസം കഴിഞ്ഞു കണ്ടപ്പോള് അവ തിരിച്ചറിയാന് ആവാത്ത വിധം ചുട്ടു കരിക്കപ്പെട്ട നിലയിലായിരുന്നു എന്നും ഇയാള് കോടതിക്കു മുന്പാകെ മൊഴി നല്കി. തനിക്ക് ഭയം ഉണ്ടായിരു ന്നുവെങ്കിലും കോടതിയ്ക്ക് അകത്ത് എത്തിയപ്പോള് താന് എല്ലാ സത്യങ്ങളും കോടതിയ്ക്ക് മുന്പാകെ ബോധിപ്പിയ്ക്കാന് തീരുമാനി യ്ക്കുകയായി രുന്നുവെന്നും ഇയാള് അറിയിച്ചു. സുപ്രീം കോടതിയുടെ നേരിട്ടുള്ള മേല്നോട്ടത്തിലാണ് കോടതി നടപടികള് പുരോഗമിക്കുന്നത്. കൂട്ട കൊലയില് ഇയാളുടെ അമ്മ അടക്കം ഏഴ് കുടുംബാംഗ ങ്ങളായിരുന്നു കൊല്ലപ്പെട്ടത്. സാക്ഷിയ്ക്ക് കേന്ദ്ര സുരക്ഷാ സേനയുടെ സംരക്ഷണം ഏര്പ്പെടു ത്തിയിട്ടുണ്ട്. ഇത് ഏറെ സ്വാഗതാ ര്ഹമായ നീക്കമാണ് എന്ന് മനുഷ്യാവകാശ സംഘടനകള് കരുതുന്നു. ഇത്തരം സുരക്ഷാ ബോധം മറ്റുള്ള സാക്ഷികള്ക്കും സത്യം ബോധിപ്പി ക്കാനുള്ള പ്രചോദന മാവും എന്ന് പ്രതീക്ഷിക്കു ന്നതായി പ്രമുഖ മനുഷ്യാ വകാശ പ്രവര്ത്തകയും സിറ്റിസണ്സ് ഫോര് പീസ് ആന്ഡ് ജസ്റ്റിസ് സെക്രട്ടറിയുമായ ടീസ്റ്റ സെതല്വാദ് പറഞ്ഞു. ടീസ്റ്റയെയും, അചഞ്ചലവും നീതിപൂര്വ്വ വുമായ കര്ത്തവ്യ നിര്വ്വഹണം മൂലം നരേന്ദ്ര മോഡിയുടെ രോഷത്തിന് പാത്രമായ മുന് ഗുജറാത്ത് ഡി. ജി. പി. ബി.ആര്. ശ്രീകുമാറിനെയും കോടതി നടപടികളില് പങ്കെടുക്കു ന്നതില് നിന്നും വിലക്കണം എന്ന പ്രതി ഭാഗത്തിന്റെ ആവശ്യം കോടതി നേരത്തേ തള്ളി കളഞ്ഞിരുന്നു. Narendra Modi turned a deaf ear to cries for help says witness Labels: കുറ്റകൃത്യം, കോടതി, തീവ്രവാദം
- ജെ. എസ്.
( Friday, November 06, 2009 ) |
|
അനുഷ്ക്കയെ ഭീഷണിപ്പെടുത്തിയ ആള് ജാമ്യത്തിനു ശ്രമിക്കുന്നു
 ഡല്ഹി : വിഖ്യാത സിത്താര് വിദ്വാന് പണ്ഡിറ്റ് രവിശങ്കറിന്റെ പുത്രിയെ സ്വകാര്യ ചിത്രങ്ങള് വെളിപ്പെടുത്തുമെന്ന് ഭീഷണിപ്പെടുത്തി പണം പിടുങ്ങാന് ശ്രമിച്ച ജുനൈ ഖാന് ഡല്ഹി കോടതിയില് ജാമ്യത്തിനു ശ്രമിക്കുന്നു. എന്നാല് പോലീസ് ഈ നീക്കത്തെ ചെറുക്കുന്നുണ്ട്. സെപ്റ്റെംബര് പതിനാലിന് മുംബൈയില് വെച്ച് ഡല്ഹി പോലീസിന്റെ പ്രത്യേക സെല്ലിന്റെ പിടിയിലായ ഖാന് ഒന്നേകാല് ലക്ഷം ഡോളറാണ് ചിത്രങ്ങള് വെളിപ്പെടുത്താതിരിക്കാന് ആവശ്യപ്പെട്ടിരുന്നത്. Anoushka's blackmailer seeks bail Labels: കുറ്റകൃത്യം, തട്ടിപ്പ്
- ജെ. എസ്.
( Wednesday, October 14, 2009 ) |
|
റഷ്യയില് 17 മാധ്യമ പ്രവര്ത്തകര് കൊല്ലപ്പെട്ടു
 കഴിഞ്ഞ ഒന്പതു വര്ഷത്തിനിടയ്ക്ക് റഷ്യയില് 17 മാധ്യമ പ്രവര്ത്തകര് കൊല്ലപ്പെട്ടു. ഇതില് ആകെ ഒരു കേസില് മാത്രമാണ് പ്രതികള് ശിക്ഷിക്കപ്പെട്ടത്. ജനാധിപത്യ വ്യവസ്ഥിതി യിലേയ്ക്ക് മാറിയ ശക്തമായ ഒരു രാഷ്ട്രത്തെ സംബന്ധിച്ചിടത്തോളം ഇത് തികച്ചും നാണക്കേട് ഉളവാക്കുന്ന കണക്കുകളാണ്. മാധ്യമ പ്രവര്ത്തകരുടെ സംരക്ഷണ സമിതി (കമ്മിറ്റി ടു പ്രൊട്ടെക്ട് ജേണലിസ്റ്റ്സ്) എന്ന സംഘടനയുടെ അന്വേഷണ റിപ്പോര്ട്ടാണ് ഈ ഞെട്ടിയ്ക്കുന്ന വസ്തുതകള് പുറത്ത് കൊണ്ടു വന്നത്. മാധ്യമ പ്രവര്ത്തനത്തെ തുടര്ന്നുണ്ടായ ശത്രുതയാണ് ഈ കൊലപാത കങ്ങള്ക്ക് കാരണമായത് എന്ന് റിപ്പോര്ട്ട് ചൂണ്ടി കാണിക്കുന്നു.  റഷ്യയില് കൊല്ലപ്പെട്ട മാധ്യമ പ്രവര്ത്തകര് എഡിറ്റര്, റിപ്പോര്ട്ടര്, ഫോട്ടോഗ്രാഫര്, കോളമിസ്റ്റ്, പ്രസാധകര് എന്നിങ്ങനെ മാധ്യമ പ്രവര്ത്തനത്തിന്റെ വിവിധ തുറകളില് പ്രവര്ത്തി ക്കുന്നവരാണ് കൊല്ലപ്പെട്ടത്. സര്ക്കാരിനെതിരെയോ, പ്രബലരായ വ്യവസായിക ള്ക്കെതിരെയോ അധോലോക ത്തിനെതിരെയോ എഴുതിയവ രായിരുന്നു കൊല്ലപ്പട്ടവര് എല്ലാവരും. മാധ്യമ പ്രവര്ത്തകര്ക്ക് ഏറ്റവും അപകടകരമായ രാജ്യങ്ങളില് മൂന്നാം സ്ഥാനത്താണ് റഷ്യ. ഒന്നാം സ്ഥാനം ഇറാഖിനും രണ്ടാം സ്ഥാനം അല്ജീരിയയ്ക്കും ആണ്. Unsolved Killings of Journalists in Russia Labels: കുറ്റകൃത്യം, മാധ്യമങ്ങള്
- ജെ. എസ്.
( Wednesday, September 23, 2009 ) |
|
അഭയയുടെ കല്ത്ത് നശ്ക്കിയത് ആര്?
 സി.ബി.ഐ. അന്വേഷിച്ച സിസ്റ്റര് അഭയ വധ ക്കേസിലെ പ്രതികളായ സിസ്റ്റര് സെഫി, ഫാദര് ജോസ് പുതൃക്കയില് എന്നിവരെ ബാംഗ്ലൂരില് വെച്ച് നാര്കോ അനാലിസിസിന് വിധേയമാക്കിയതിന്റെ വീഡിയോ ദൃശ്യങ്ങള് ഇന്നലെ കേരളത്തിലെ മാധ്യമങ്ങള് പുറത്തു വിട്ടു. ഈ വീഡിയോ സി.ഡി. കോടതിയില് ഹാജരാക്കിയ വേളയില് അതിലെ ദൃശ്യങ്ങള് എഡിറ്റ് ചെയ്യപ്പെട്ടിരുന്നതായി കണ്ടെത്തിയിരുന്നു. അതിന്റെ ഒറിജിനല് രൂപമാണ് ഇന്നലെ ടെലിവിഷന് ചാനലുകള് കേരള ജനതയ്ക്ക് മുന്പാകെ പ്രദര്ശിപ്പിച്ചത്. ഈ വീഡിയോ ആരോ മാധ്യമ ഓഫീസുകളില് എത്തിച്ചു കൊടുക്കുകയായിരുന്നു. ഏഷ്യാനെറ്റ്, ഇന്ത്യാവിഷന്, കൈരളി ടിവി. എന്നിങ്ങനെ ഒട്ടു മിക്ക ചാനലുകളും ഈ ദൃശ്യങ്ങള് പ്രദര്ശിപ്പിച്ചു. എന്നാല് പിന്നീട് ചീഫ് ജുഡീഷ്യല് മജിസ്ട്രേട്ടിന്റെ അഭ്യര്ത്ഥന മാനിച്ച് ചാനലുകള് ഈ പ്രക്ഷേപണം നിര്ത്തി വെച്ചു. കോടതിയുടെ പരിഗണനയില് ഉള്ള കേസിനെ പ്രക്ഷേപണം ബാധിക്കും എന്ന കാരണത്താലാണ് പ്രക്ഷേപണം നിര്ത്തി വെയ്ക്കാന് മജിസ്ട്രേട്ട് ആവശ്യപ്പെട്ടത്.മയക്കു മരുന്ന് കുത്തി വെച്ച് മനസ്സിനെ തളര്ത്തി ചോദ്യം ചെയ്യുന്ന വേളയില് മുന് കരുതലോടെ സംസാരിക്കാനുള്ള ശേഷി നഷ്ടപ്പെടുകയും സത്യം വെളിപ്പെടുകയും ചെയ്യും എന്നതാണ് നാര്കോ അനാലിസിസിന്റെ തത്വം. എന്നാല് ചോദ്യം ചോദിക്കുന്ന ആളുടെ വൈദഗ്ദ്ധ്യം ഇതിന് ഒരു പ്രധാന ഘടകമാണ്. പ്രതിയെ ഉത്തരങ്ങളിലേയ്ക്ക് വലിച്ചിഴയ്ക്കുന്ന രീതിയില് ചോദ്യങ്ങള് ചോദിയ്ക്കുന്നത് ശരിയായ നടപടിയല്ല. മലയാളികളായ പ്രതികളോട് ചോദ്യങ്ങള് ചോദിച്ച സ്ത്രീ ശബ്ദത്തിന്റെ ഉടമയ്ക്ക് മലയാളം നന്നായി വശമില്ലായിരുന്നു. പല ചോദ്യങ്ങളും പ്രതികള്ക്ക് മനസ്സിലായില്ലെന്ന് വ്യക്തം. സിസ്റ്റര് അഭയാനെ തട്ടിയത് ആരാ? (അടിച്ചത് എന്നാണ് ഉദ്ദേശിച്ചത്) എന്തിനാ തട്ടിയത് അവരെ? എവിടെവിടെ തട്ടിയിട്ടുണ്ടായിരുന്നു? കല്ത്ത് ആരെങ്കിലും നശ്ക്കിയോ? അഭയാന്റെ കല്ത്ത് നിങ്ങള് നശ്ക്കിയോ? (കഴുത്ത് ഞെരുക്കിയോ എന്നാണ് ചോദ്യം) ഇതൊന്നും മനസ്സിലാവാതെ പ്രതികള് മുക്കിയും മൂളിയും മറുപടി പറയുവാനാവാതെ കഷ്ടപ്പെടുന്നുണ്ടായിരുന്നു. ഇതിന്റെ വീഡിയോ ദൃശ്യങ്ങള് ഇവിടെ ലഭ്യമാണ്. Labels: കുറ്റകൃത്യം, പോലീസ്, വിവാദം
- ജെ. എസ്.
( Tuesday, September 15, 2009 ) 1 Comments:
Links to this post: |
|
വംശീയ ആക്രമണത്തില് പെണ്കുട്ടികള്ക്കും പങ്ക്
 വംശീയ ആക്രമണത്തില് കൊല്ലപ്പെട്ട ഇന്ത്യന് വംശജന് ഇക്രം ഹഖിനെ ആക്രമിച്ച ചെറുപ്പക്കാരുടെ സംഘത്തില് പെണ്കുട്ടികളും ഉണ്ടായിരുന്നു എന്ന് പോലീസ് കണ്ടെത്തി. റമദാന് ആയതിനാല് തന്റെ ചെറുമകളുമായി പള്ളിയില് നിന്നും പ്രാര്ത്ഥന കഴിഞ്ഞു വീട്ടിലേക്ക് മടങ്ങവെയാണ് ഒരു സംഘം ചെറുപ്പക്കാര് ഇവരെ ആക്രമിച്ചത്. ഓഗസ്റ്റ് 31 ന് നടന്ന ആക്രമണത്തില് തലക്ക് അടിയേറ്റ് ഗുരുതരമായി പരിക്കേറ്റ ഇക്രം ഹഖ് പിന്നീട് ആശുപത്രിയില് വെച്ച് മരണമടഞ്ഞു എന്നാണ് കേസ്. ആക്രമണത്തെ തുടര്ന്ന് ഉണ്ടായ ഞെട്ടലില് നിന്നും ബ്രിട്ടനിലെ ഇന്ത്യന് സമൂഹം ഇനിയും മോചിതമായിട്ടില്ല. ഭയം മൂലം സംഭവം കണ്ടു നിന്ന ദൃക് സാക്ഷികള് പോലും പോലീസിന് മൊഴി നല്കാന് തയ്യാറായിട്ടില്ല എന്നത് കേസിനെ ദുര്ബലമാക്കുന്നു. പതിനഞ്ച് വയസിനു താഴെയുള്ള മൂന്ന് കുട്ടികള്ക്കെതിരെ പോലീസ് കേസെടുക്കുകയും ഇവര് കോടതിയില് ഹാജരാകുകയും ചെയ്തിട്ടുണ്ട്. കൂടെ ഉണ്ടായിരുന്ന പെണ്കുട്ടികളെ പോലീസ് തിരയുകയാണ്.UK Police looking for teenage girls in racial attack Labels: കുറ്റകൃത്യം, തീവ്രവാദം, പ്രവാസി, ബ്രിട്ടന്
- ജെ. എസ്.
( Friday, September 11, 2009 ) |
|
ഓംപ്രകാശും പുത്തന്പാലം രാജേഷും ദുബായില്; സിംഗപ്പൂരിലേക്ക് കടക്കാന് ശ്രമം
 കുപ്രസിദ്ധ ഗുണ്ടകളായ ഓംപ്രകാശും പുത്തന്പാലം രാജേഷും ദുബായില് ഉള്ളതായി സൂചന. പോലീസ് ഇവര്ക്ക് വേണ്ടി അന്വേഷണം ഊര്ജ്ജിതമാക്കിയ സാഹചര്യത്തിലാണ് ഇവര് ദുബായിലേക്ക് കടന്നത്. മലയാളത്തിലെ ഒരു പ്രമുഖ ചാനലാണ് ഇക്കാര്യം റിപ്പോര്ട്ട് ചെയ്തത്.മുത്തുറ്റ് പോള് വധവുമായി ബന്ധപ്പെട്ട് പോലീസ് അന്വേഷിക്കുന്ന കുപ്രസിദ്ധ ഗുണ്ടകളായ ഓംപ്രകാശും പുത്തന്പാലം രാജേഷും ദുബായില് എത്തിയതായാണ് സൂചന. കഴിഞ്ഞ ബുധനാഴ്ച മുതല് ഇവര് ദുബായില് ഉണ്ടെന്നറിയുന്നു. മലയാളിയുടെ ഉടമസ്ഥതയിലുള്ള ദേര ദുബായിലെ ഒരു ഹോട്ടലിലാണ് ഇവര് തങ്ങുന്നത്. പത്രങ്ങളിലും ടിവി ചാനലുകളിലും തുടര്ച്ചയായി ഇവരുടെ ഫോട്ടോകളും വിഷ്വലുകളും കാണിക്കുന്ന സാഹചര്യത്തില് ആളുകള് തിരിച്ചറിയാ തിരിക്കാനായി ഇവര് പകല് സമയങ്ങളില് ഹോട്ടലില് നിന്ന് പുറത്തിറങ്ങാറില്ല. ഭക്ഷണം മുറിയില് എത്തിച്ച് കൊടുക്കുകയാണ് ചെയ്യുന്നത്. ചില രാത്രികളില് ബര്ദുബായിലെ ചില ബാറുകളില് ഇരുവരും സന്ദര്ശനം നടത്താറുണ്ടെന്നും അറിയുന്നു. അതേ സമയം ഏത് വിമാനത്താവളം വഴിയാണ് ഇവര് ദുബായില് എത്തിയതെന്നത് വ്യക്തമല്ല. ഓം പ്രകാശിന് യു.എ.ഇ. റസിഡന്റ് വിസ ഉണ്ടെന്നാണ് അറിയുന്നത്. പുത്തന്പാലം രാജേഷും ഓംപ്രകാശും നേരത്തെ ദുബായില് ഉണ്ടായിരുന്നു. ഈയിടെയാണ് രണ്ട് പേരും കേരളത്തിലേക്ക് പോയത്. പിന്നീട് മുത്തൂറ്റ് പോള് വധവുമായി ബന്ധപ്പെട്ട് അന്വേഷണം നടക്കുന്ന സാഹചര്യത്തില് സുരക്ഷിതമായ ഒളിത്താവളം എന്ന നിലയ്ക്കാണ് ഇവര് ദുബായില് എത്തിയത്. തിരൂവോണത്തിന് മുമ്പ് കീഴടങ്ങാന് സാധിച്ചില്ലെങ്കില് സിംഗപ്പൂരിലേക്ക് കടക്കാനാണ് ശ്രമമെന്നും റിപ്പോര്ട്ടില് പറയുന്നു. Labels: കുറ്റകൃത്യം, കേരളം, ക്രമസമാധാനം, പോലീസ്
- സ്വന്തം ലേഖകന്
( Sunday, August 30, 2009 ) |
|
ഇടപാട് വിവരങ്ങള് സ്വിസ്സ് ബാങ്കുകള് ഇന്ത്യക്ക് കൈമാറില്ല
 നികുതി വെട്ടിപ്പ് നടത്തി പണം സ്വിസ്സ് ബാങ്കുകളില് നിക്ഷേപിച്ച ഇന്ത്യാക്കാരുടെ വിവരങ്ങള് തങ്ങള്ക്ക് കൈമാറണം എന്ന ഇന്ത്യാ സര്ക്കാരിന്റെ ആവശ്യം സ്വിസ്സ് ബാങ്കായ യു.ബി.എസ്. നിരാകരിച്ചു. അമേരിക്കയുടെ ആവശ്യ പ്രകാരം അമേരിക്കന് ഇടപാടുകാരുടെ വിവരങ്ങള് വെളിപ്പെടുത്താം എന്ന് യു.ബി.എസ്. സമ്മതിച്ചതിന് തൊട്ടു പുറകെയാണ് ഇന്ത്യയുടെ ആവശ്യം തള്ളിയത്. ഇത് സ്വിസ്സ് അധികൃതരുമായി ചര്ച്ച ചെയ്യും എന്ന് ധന മന്ത്രി പ്രണബ് മുഖര്ജി അറിയിച്ചു.സാമ്പത്തിക മാന്ദ്യത്തില് പെട്ടുഴലുന്ന അമേരിക്കയുടെ 20 ബില്യണ് ഡോളറെങ്കിലും ഇപ്രകാരം യു.ബി.എസ്. ബാങ്കിന്റെ പക്കല് ഉണ്ടെന്ന് അമേരിക്കന് സാമ്പത്തിക വകുപ്പ് അനുമാനിക്കുന്നു. ഇത് തിരിച്ചു പിടിക്കാനായി അമേരിക്കന് കോടതിയില് അമേരിക്കന് പൌരന്മാര്ക്ക് നികുതി വെട്ടിപ്പ് നടത്തുവാന് സൌകര്യം ഒരുക്കി എന്ന കുറ്റത്തിന് യു.ബി.എസ്. ബാങ്കിന് എതിരെ കേസ് നിലവിലുണ്ട്. ഈ കേസില് തെളിവുകള് തങ്ങള്ക്കെതിരെ ശക്തമാണ് എന്ന് മനസ്സിലാക്കിയാണ് ഒത്തു തീര്പ്പിന് സ്വിസ് ബാങ്ക് തയ്യാറായത്. ഒത്തു തീര്പ്പ് തുകയായി 280 മില്യണ് ഡോളര് അമേരിക്കക്ക് കേസ് തീര്ക്കാനായി ബാങ്ക് നല്കുകയും ചെയ്തു. ഇത്ര ശക്തമായ നിയമ നടപടികള് കൊണ്ട് അമേരിക്ക സാധിച്ചെടുത്ത കാര്യമാണ് ഇന്ത്യ കേവലം നയതന്ത്ര ഇടപെടലുകള് കൊണ്ട് സാധിക്കാന് ശ്രമിച്ചതും, അതില് പരാജയപ്പെട്ടതും. യു.ബി.എസ്. സ്വിറ്റ്സര്ലാന്ഡിലെ അനേകം ബാങ്കുകളില് ഒന്ന് മാത്രമാണ്. മറ്റ് ബാങ്കുകളിലെ ഇടപാടുകളൊന്നും വെളിപ്പെടുത്താന് ആരും തയ്യാറായിട്ടുമില്ല. സ്വിസ്സ് ബാങ്കിങ് നിയമപ്രകാരം ഏറ്റവും അധികം വിലമതിക്കപ്പെടുന്ന ഒന്നാണ് ഇടപാടുകാരന്റെ സ്വകാര്യത. അമേരിക്കന് സാമ്പത്തിക വകുപ്പിന്റെ വര്ഷങ്ങളുടെ അന്വേഷണ ഫലമായാണ് 52000 അമേരിക്കക്കാരുടെ യു.ബി.എസ്. ബാങ്ക് ഇടപാടുകള് കണ്ടെത്തിയത്. ഇത്രയും ശക്തമായ തെളിവുകള് നല്കിയിട്ടും ഇതില് നിന്നും വെറും 4450 പേരുടെ വിവരങ്ങള് മാത്രമാണ് യു.ബി.എസ്. അമേരിക്കക്ക് വെളിപ്പെടുത്താന് തയ്യാറായിട്ടുള്ളത്. ഇതിനര്ത്ഥം യു.ബി.എസ്. ബാങ്കിലുള്ള അമേരിക്ക കണ്ടെത്തിയിട്ടുള്ള 47550 പേരുടെയും കണ്ടെത്താനാവത്ത മറ്റുള്ളവരുടെയും മറ്റ് സ്വിസ്സ് ബാങ്കുകളില് ഇടപാട് ഉള്ളവരുടെയും പണം തിരിച്ചു പിടിക്കാനാവില്ല എന്നു തന്നെയാണ്. കഴിഞ്ഞ തെരഞ്ഞെടുപ്പ് വേളയില് ബി.ജെ.പി. നേതാവ് അദ്വാനി, സ്വിസ്സ് ബാങ്കുകളില് നിയമ വിരുദ്ധമായി കിടക്കുന്ന ഇന്ത്യാക്കാരുടെ പണം തിരിച്ചു പിടിക്കണമെന്ന് ആവശ്യപ്പെട്ടതിനെ തുടര്ന്ന് ഈ ആവശ്യം ഇന്ത്യയില് ഏറെ ചര്ച്ച ചെയ്യപ്പെട്ടിരുന്നു. ഇതിനെ തുടര്ന്നാണ് ഇന്ത്യാക്കാരുടെ ഇടപാട് വിവരങ്ങള് വെളിപ്പെടുത്തണം എന്ന് കേന്ദ്ര സര്ക്കാര് സ്വിസ്സ് ബാങ്കുകളോട് ആവശ്യപ്പെട്ടത്. എന്നാല് ആന പിണ്ടമിടുന്നത് കണ്ട് അണ്ണാന് മുക്കിയ പോലെയായി ഇന്ത്യയുടെ അവസ്ഥ. ഇന്ത്യയുടെ ടെലിഫോണ് ഡയറക്ടറി കാണിച്ച് ഇതില് ആര്ക്കെങ്കിലും ഇവിടെ അക്കൌണ്ടുണ്ടോ എന്നും ചോദിച്ച് ആരും സ്വിറ്റ്സര് ലാന്ഡിലേക്ക് വരേണ്ടതില്ല എന്ന അവജ്ഞ നിറഞ്ഞ പരാമര്ശമാണ് ഇന്ത്യക്ക് കേള്ക്കേണ്ടി വന്നത്. എന്തെങ്കിലും ‘രസകരമായ’ വിവരങ്ങള് ലഭിക്കും എന്ന പ്രതീക്ഷയില് ഇത്തരം തിരച്ചില് നടത്താന് സ്വിസ്സ് നിയമം അനുവദിക്കുന്നില്ല എന്നും അവര് വ്യക്തമാക്കി. സമഗ്രമായ ഒരു അന്വേഷണം നടത്തുകയും, ഇത്തരത്തില് കള്ള പണം പൂഴ്ത്തി വെച്ചവരുടെ വിവരങ്ങള് ശേഖരിക്കുകയും, നിയമ നടപടികള് സ്വീകരിച്ച് അതിന്റെ പിന് ബലത്തില് ആത്മ വിശ്വാസത്തോടെ ആവശ്യപ്പെടുകയും ചെയ്താല് ഇന്ത്യയെ പോലെയുള്ള ഒരു ശക്തമായ രാഷ്ട്രത്തിന്റെ ന്യായമായ ആവശ്യത്തിനു മുന്പില് ഒരു ലോക ശക്തിക്കും എതിര്ത്തു നില്ക്കുവാന് കഴിയില്ല. പ്രത്യേകിച്ചും ലോകം കടന്നു പോയി കൊണ്ടിരിക്കുന്ന സാമ്പത്തിക പ്രതിസന്ധിയില് നിന്നും ഒത്തൊരുമിച്ച് കര കയറുവാന് ലോക രാഷ്ട്രങ്ങള് ശ്രമിച്ചു കൊണ്ടിരിക്കുന്ന ഈ അവസരത്തില്. എന്നാല് ഹ്രസ്വ കാല നേട്ടങ്ങളും സ്വാര്ത്ഥ ലാഭവും മാത്രം ലക്ഷ്യമിട്ട് രാജ്യ താല്പര്യങ്ങള് അടിയറവ് വെച്ച് കരാറുകള് ഒപ്പിട്ട്, മറ്റു രാഷ്ട്രങ്ങള്ക്ക് മുന്പില് സ്വമേധയാ നട്ടെല്ല് വളച്ചു പരിചയിച്ചവര്ക്ക് ഇതിനാവില്ലല്ലോ. അമേരിക്കയുടെ 20 ബില്ല്യണ് ഡോളര് സ്വിസ്സ് ബാങ്കുകളില് കിടക്കുന്നു എന്ന് അമേരിക്ക പറയുമ്പോള് ഇന്ത്യാക്കാരുടെ 1500 ബില്ല്യണ് ഡോളറുമായി ഇന്ത്യക്കാണ് സ്വിസ്സ് ബാങ്ക് നിക്ഷേപങ്ങളുടെ കാര്യത്തില് ലോകത്തില് ഒന്നാം സ്ഥാനം എന്ന് കരുതപ്പെടുന്നു. Swiss Banks declined India's request to unearth its black money Labels: അന്താരാഷ്ട്രം, കുറ്റകൃത്യം, സാമ്പത്തികം
- ജെ. എസ്.
( Monday, August 24, 2009 ) |
|
സര്ക്കാര് ആശുപത്രിയില് ഹൃദയ വാല്വ് കച്ചവടം
 തിരുവനന്തപുരം : സര്ക്കാര് മെഡിക്കല് കോളജ് ആശുപത്രിയില് നടന്നു വന്ന കൃത്രിമ ഹൃദയ വാല്വ് കച്ചവടത്തിന്റെ കഥ പുറത്തു വന്നു. ദാരിദ്ര്യ രേഖക്ക് താഴെ ഉള്ളവര്ക്ക് ലഭിക്കുന്ന സൌജന്യ ഹൃദയ വാല്വ് മറിച്ച് വില്ക്കുന്ന സംഘത്തിലെ ഒരു കണ്ണിയായ നെയ്യാറ്റിന്കര പ്രേമ ചന്ദ്രന്റെ അറസ്റ്റോടെ ആണ് ഈ ഞെട്ടിക്കുന്ന കഥ പുറത്തായത്. ആശുപത്രിയില് ചികിത്സക്ക് എത്തിയ രണ്ട് സ്ത്രീകളുടെ പരാതി ലഭിച്ചതിനെ തുടര്ന്നാണ് ഞായറാഴ്ച പോലീസ് പ്രേമ ചന്ദ്രനെ പിടി കൂടിയത്. വാല്വ് കച്ചവട സംഘത്തിലെ പ്രധാന കണ്ണിയാണ് പിടിയിലായ പ്രേമ ചന്ദ്രന് എന്ന് പോലീസ് അറിയിച്ചു. ജുഡീഷ്യല് കസ്റ്റഡിയിലായ ഇയാളെ കൂടുതല് അന്വേഷണങ്ങള്ക്കായി പോലീസ് കസ്റ്റഡിയില് എടുക്കും എന്ന് പോലീസ് അറിയിച്ചു. ദാരിദ്ര്യ രേഖക്ക് താഴെ ഉള്ള ഹൃദ്രോഗികള്ക്ക് ആശുപത്രിയില് നിന്നും കൃത്രിമ വാല്വ് സൌജന്യമായി ലഭിക്കും. ഇതിനായി പേര് റെജിസ്റ്റര് ചെയ്തവരില് നിന്നും ആശുപത്രി ഉദ്യോഗസ്ഥരുടെ സഹായത്തോടെ വാല്വ് കൈവശപ്പെടുത്തി ഇത് വന് തുകകള്ക്ക് മറ്റ് ആവശ്യക്കാര്ക്ക് മറിച്ച് വില്ക്കുക ആയിരുന്നു ഇവരുടെ രീതി. കൂടുതല് അന്വേഷണത്തിനു ശേഷം മാത്രമേ ഇവരുടെ പ്രവര്ത്തനത്തെ കുറിച്ച് കൂടുതല് പറയാന് കഴിയൂ എന്ന് പോലീസ് പറഞ്ഞു. സംഭവത്തെ പറ്റി കൂടുതല് അന്വേഷിക്കാന് ഉദ്യോഗസ്ഥരും ഡോക്ടര്മാരും അടങ്ങുന്ന ഒരു സംഘം ഉടന് രൂപീകരിക്കും എന്ന് ആരോഗ്യ മന്ത്രാലയം അറിയിച്ചു. Labels: ആരോഗ്യം, കുറ്റകൃത്യം
- ജെ. എസ്.
( Tuesday, July 28, 2009 ) |
|
കൊല്ലപ്പെടുന്നതിനു മുന്പ് പ്രഭാകരന് കൊടിയ പീഡനങ്ങള് ഏറ്റ് വാങ്ങി
 തമിഴ് പുലി നേതാവ് വേലുപ്പിള്ള പ്രഭാകരനെ ശ്രീലങ്കന് സേന കടുത്ത ശാരീരിക പീഡനങ്ങള്ക്ക് വിധേയം ആക്കിയിരുന്നെന്ന് ഒരു പ്രമുഖ മനുഷ്യാവാകാശ സംഘടനയുടെ കഴിഞ്ഞ ആഴ്ച പുറത്തു വന്ന റിപ്പോര്ട്ടില് പറയുന്നു. ഉന്നത സൈനിക വൃത്തങ്ങളെ ഉദ്ധരിച്ചാണ് സര്വ്വകലാശാലാ അധ്യാപകരുടെ ഈ മനുഷ്യാവകാശ സംഘടന ഈ വിവരങ്ങള് പുറത്തു വിട്ടത്. പ്രഭാകരനെ പീഡനങ്ങള് ഏല്പ്പിച്ചത് ഒരു തമിഴ് രാഷ്ട്രീയ നേതാവിന്റെയും ജനറലിന്റെയും സാന്നിധ്യത്തില് ആണ്. കഴിഞ്ഞ മാസം, ശ്രീലങ്കന് പട്ടാളത്തിന്റെ 53ന്നാം വിഭാഗത്തിന്റെ ആസ്ഥാനത്ത് വച്ച് ആയിരിക്കാം ഈ പീഡനങ്ങള് നടന്നത് എന്ന് അനുമാനിക്കാം എന്നും റിപ്പോര്ട്ടില് പറയുന്നു. ലോകത്തിന് ആകാംക്ഷ ഉള്ളത് കൊണ്ടാണ് ഏറ്റ് മുട്ടലിന് ഇടയില് കൊല്ലപ്പെട്ട പ്രഭാകരന്റെ ശവശരീരം കണ്ടെത്തിയതെന്നും മൂത്ത മകന് ചാള്സ് ആന്ടണി ഒഴികെ ഉള്ള മറ്റു കുടുംബാംഗങ്ങള് എവിടെ ആണെന്ന് അറിവില്ല എന്നുമാണ് സൈന്യത്തിന്റെ ഭാഷ്യം. Labels: അന്താരാഷ്ട്രം, കുറ്റകൃത്യം, യുദ്ധം
- ജ്യോതിസ് (e പത്രം കറസ്പോണ്ടന്റ്)
( Tuesday, June 16, 2009 ) |
|
അഴിമതി - ആന്റണി ഇസ്രയേല് കമ്പനിയെ കരിമ്പട്ടികയില് പെടുത്തി
 ഇസ്രയേല് ആയുധ നിര്മ്മാണ സ്ഥാപനം ആയ ഇസ്രയേല് മിലിട്ടറി ഇന്ഡസ്ട്രീസ് ഉള്പ്പടെ ഇന്ത്യയുമായി ആയുധ വ്യാപാരം നടത്തുന്ന ഏഴു സ്ഥാപനങ്ങളെ പ്രതിരോധ വകുപ്പ് മന്ത്രി എ. കെ. ആന്റണിയുടെ നിര്ദ്ദേശ പ്രകാരം കരിമ്പട്ടികയില് ഉള്പ്പെടുത്തി. സി. ബി. ഐ. നടത്തിയ അന്വേഷണത്തില് കൈക്കൂലി ഇടപാടുകളുടെ വ്യക്തമായ സൂചനകള് ലഭിച്ചതിന്റെ വെളിച്ചത്തില് ആണ് ഈ നടപടി. സി. ബി. ഐ. യുടെ കുറ്റ പത്രം ഇനിയും തയ്യാറായിട്ടില്ല. എന്നാല് സ്വകാര്യ ബാങ്ക് അക്കൌണ്ടുകളിലേക്ക് പണം കൈമാറ്റം ചെയ്തത് ഉള്പ്പടെ വ്യക്തമായ തെളിവുകള് ആണ് അന്വേഷണത്തില് ലഭിച്ചത്. ഇതിന്റെ അടിസ്ഥാനത്തില് ആരോപണ വിധേയമായ കമ്പനികളുമായുള്ള ഇടപാടുകള് ഉടനടി മരവിപ്പിക്കാന് പ്രതിരോധ മന്ത്രി എ. കെ. ആന്റണി ഉത്തരവ് നല്കുക ആയിരുന്നു എന്ന് പ്രതിരോധ വകുപ്പ് വക്താവ് സിതാന്ശു കര് അറിയിച്ചു.ഇസ്രയേലി മിലിട്ടറി ഇന്ഡസ്ട്രീസ്, സിംഗപ്പൂര് ടെക്നോളജി, ബി. വി. ടി. പോളണ്ട്, മീഡിയ ആര്ക്കിടെക്ട്സ് പ്രൈവറ്റ് ലിമിറ്റഡ് ഓഫ് സിംഗപ്പൂര് എന്നീ വിദേശ കമ്പനികളും ടി. എസ്. കിഷന് ആന്ഡ് കമ്പനി പ്രൈവറ്റ് ലിമിറ്റഡ്, ആര്. കെ. മഷീന് ടൂള്സ്, എഛ്. വൈ. ടി. എഞ്ചിനീയറിങ് കമ്പനി എന്നീ ഇന്ത്യന് സ്ഥാപനങ്ങളും ആണ് കരിമ്പട്ടികയില് പെട്ട ആരോപണ വിധേയമായ സ്ഥാപനങ്ങള്. ആന്റണിയുടെ നിര്ദ്ദേശ പ്രകാരം കഴിഞ്ഞ മാര്ച്ചില് ഇസ്രയേലി സ്ഥാപനവുമായി നടത്തിയ 1200 കോടി രൂപയുടെ ഇടപാടും മരവിപ്പിച്ചിട്ടുണ്ട്. ഇന്ത്യന് ഓര്ഡനന്സ് ഫാക്ടറിക്ക് വേണ്ടി ഈ ഉടമ്പടി പ്രകാരം ഇസ്രയേലിലെ ടെല് അവീവിനടുത്തുള്ള ഇസ്രയേലി മിലിട്ടറി ഇന്ഡസ്ട്രീസിന്റേതു പോലുള്ള ഒരു ആയുധ ഫാക്ടറി ബീഹാറിലെ നളന്ദയില് നിര്മ്മിക്കാന് ആയിരുന്നു പദ്ധതി. പ്രതിരോധ മേഖലയിലെ അഴിമതിക്കെതിരെ പ്രതികരിച്ച എല്ലാവര്ക്കും ഇന്നു വരെ തിക്ത ഫലങ്ങളാണ് ലഭിച്ചിട്ടുള്ളത്. അത്രയും ശക്തമായ ഒരു അന്താരാഷ്ട്ര അഴിമതി ശൃംഘല തന്നെയാണ് ഈ രംഗത്ത് ഉള്ളത്. ഈ നടപടിയും ഇതിന്റെ തുടര് നടപടികളും അനന്തര ഫലങ്ങളും അതു കൊണ്ടു തന്നെ ഏറെ പ്രാധാന്യം അര്ഹിക്കുന്നു. Labels: കുറ്റകൃത്യം, രാജ്യരക്ഷ
- ജെ. എസ്.
( Saturday, June 06, 2009 ) |
|
ആക്രമണം തുടരുന്നു - ഇന്ത്യന് വിദ്യാര്ത്ഥിക്കു നേരെ ബോംബേറ്
 വംശീയ ആക്രമണത്തിന് ഇരയായ ഇന്ത്യന് വിദ്യാര്ത്ഥി ശ്രാവണ് കുമാറിന്റെ നില അതീവ ഗുരുതരമായി തുടരുന്നതിന് ഇടയിലും ഓസ്ട്രേലിയയില് ഇന്താക്കാര്ക്ക് നേരെയുള്ള ആക്രമണങ്ങള് തുടരുന്നു. ഇന്നലെ രാത്രി നടന്ന ഏറ്റവും അവസാനത്തെ സംഭവത്തില് സിഡ്നിയിലെ ഹാരിസ് പാര്ക്കിലെ തന്റെ ഫ്ലാറ്റ് മുറിയില് കട്ടിലില് ഇരിക്കുകയായിരുന്ന രാജേഷ് കുമാര് എന്ന ഇരുപത്തി അഞ്ചുകാരന്റെ നേരെ ഒരു അജ്ഞാതന് പെട്രോള് ബോംബ് എറിഞ്ഞു. ബോംബ് പൊട്ടിത്തെറിക്കുകയും തീ ആളി പടരുകയും ചെയ്തു. കത്തി പിടിച്ച തീയുമായി ഇയാള് ഉറക്കെ നിലവിളിച്ചു കൊണ്ട് വീടിനു വെളിയിലേക്ക് ഓടിയതിനെ തുടര്ന്ന് ഇയാളുടെ അയല്ക്കാരന് ഓടി എത്തുകയും ഒരു കരിമ്പടം കൊണ്ട് പുതപ്പിച്ച് തീ കെടുത്തുകയും ആയിരുന്നു. രാജേഷ് കുമാറിന്റെ ദേഹത്ത് 30 ശതമാനം പൊള്ളല് ഏറ്റിട്ടുണ്ട്.  വെള്ളക്കാര് കൊള്ളയടിക്കുകയും കുത്തി പരിക്കേല്പ്പിക്കുകയും ചെയ്ത ബല്ജിന്ദര് സിംഗ് നേരത്തേ വെള്ളക്കാരുടെ ആക്രമണത്തിന് ഇരയായിരുന്ന നാല് ഇന്ത്യന് വിദ്യാര്ത്ഥികള് ആശുപത്രിയില് കിടക്കുമ്പോള് ഇവരുടെ വീടുകള് കൊള്ള അടിച്ച് സംഭവം ഏവരേയും അമ്പരപ്പിച്ചിരുന്നു. ഇവരുടെ വീട്ടില് കയറി അവിടെയുള്ള സര്വ്വതും കൊള്ളയടിച്ചു. ഇവര്ക്ക് വീട്ടിലെത്തിയാല് മാറ്റിയിടാന് വസ്ത്രം പോലും കൊള്ളക്കാര് ബാക്കി വെച്ചിട്ടില്ല എന്ന് ഓസ്ട്രേലിയയിലെ വിദ്യാര്ത്ഥി സംഘടനയായ ഫെഡറേഷന് ഓഫ് ഇന്ത്യന് സ്റ്റുഡന്സ് ഓഫ് ഓസ്ട്രേലിയയുടെ (Federation of Indian Students of Australia - FISA) യുടെ പ്രതിനിധികള് അറിയിച്ചു. Labels: കുറ്റകൃത്യം, തീവ്രവാദം
- ജെ. എസ്.
( Friday, May 29, 2009 ) |
|
ഇന്ത്യന് നാവികന് കൊല്ലപ്പെട്ടു
 സോമാലിയന് കടല് കൊള്ളക്കാര് ഒരു ഇന്ത്യന് നാവികനെ വെടി വെച്ചു കൊലപ്പെടുത്തി എന്ന് ഇന്ത്യന് ഷിപ്പിങ് ഡയറക്ടറേറ്റ് വെളിപ്പെടുത്തി. കഴിഞ്ഞ ജനുവരിയില് കടല് കൊള്ളക്കാര് തട്ടി എടുത്ത എം.റ്റി. സീ പ്രിന്സസ് 2 എന്ന കപ്പലിലെ ജോലിക്കാരനായ സുധീര് സുമന് ആണ് കടല് കൊള്ളക്കാരുടെ വെടിയേറ്റ് മരിച്ചത്. ജനുവരി രണ്ടിന് വെടിയേറ്റ സുമന് ഏറെ നാള് പരിക്കുകളോടെ കടല് കൊള്ളക്കാരുടെ നിയന്ത്രണത്തില് ഉള്ള കപ്പലില് കഴിഞ്ഞു എങ്കിലും ഏപ്രില് 26ന് ആരോഗ്യ സ്ഥിതി വഷളായതിനെ തുടര്ന്ന് മരണ മടയുക യായിരുന്നു. ശവ ശരീരം കൊള്ളക്കാര് കടലില് എറിഞ്ഞു കളഞ്ഞു എന്ന് ഇന്ത്യന് ഷിപ്പിങ് ഡയറക്ടറേറ്റ് പുറത്തു വിട്ട പത്ര കുറിപ്പില് അറിയിച്ചു. കപ്പലിലെ മറ്റൊരു ഇന്ത്യന് ജീവനക്കാരന് ആയ കമല് സിങ്ങിനും കൊള്ളക്കാരുടെ വെടി ഏറ്റിട്ടുണ്ട്. ഇദ്ദേഹത്തിന്റെ പരിക്കുകള് ഭേദം ആയതിനെ തുടര്ന്ന് ഇദ്ദേഹം കപ്പലില് ജോലി പുനരാരംഭിച്ചിട്ടുണ്ട് എന്ന് കപ്പലിന്റെ മാനേജര് അറിയിച്ചു.
Labels: അന്താരാഷ്ട്രം, കുറ്റകൃത്യം
- ജെ. എസ്.
( Sunday, May 10, 2009 ) |
|
സ്ത്രീകളെ നഗ്നരാക്കി നടത്തി ശിക്ഷിച്ചു
മധ്യപ്രദേശ് : ഒരു പെണ്കുട്ടിയെ കാമുകനോടൊപ്പം ഒളിച്ചോടി പോവാന് സഹായിച്ചു എന്ന കുറ്റം ആരോപിച്ച് മധ്യപ്രദേശിലെ തല്വാഡാ ഗ്രാമത്തില് രണ്ട് സ്ത്രീകളെ പരസ്യമായി നഗ്നരാക്കി പൊതു നിരത്തിലൂടെ നടത്തിച്ചു. ഇവരെ പെണ്കുട്ടിയുടെ കുടുംബാംഗങ്ങള് പിടികൂടി നന്നായി മര്ദ്ദിക്കുകയും, മര്ദ്ദനത്തെ തുടര്ന്ന് ഇവരെ പരസ്യമായി നഗ്നരാക്കി പൊതു നിരത്തിലൂടെ നടത്തിക്കുകയും ചെയ്തു എന്ന് സ്ഥലം പോലീസ് സൂപ്രണ്ട് അറിയിച്ചു. പോലീസ് സ്റ്റേഷന് വരെ ഇങ്ങനെ നടന്ന ഇവര് പരാതി പറഞ്ഞു എങ്കിലും ആദ്യം പോലീസ് വെറും ബലപ്രയോഗ ത്തിനാണത്രെ കേസ് ചാര്ജ് ചെയ്തത്. എന്നാല് പിന്നീട് സംഭവം ഉന്നതങ്ങളില് എത്തിയതിനെ തുടര്ന്ന് മാനനഷ്ടത്തിനും സ്ത്രീ പീഢനത്തിനും മറ്റും ഐ.പി.സി. 354ാം വകുപ്പ് പ്രകാരം കേസെടുക്കുകയും കുറ്റക്കാരെ എല്ലാം അറസ്റ്റ് ചെയ്യുകയും ആയിരുന്നു.
Labels: ഇന്ത്യ, കുറ്റകൃത്യം
- ജെ. എസ്.
( Tuesday, May 05, 2009 ) 1 Comments:
Links to this post: |
|
ബാധ ഒഴിപ്പിക്കല് : യുവതി കൊല്ലപ്പെട്ടു
 പ്രേത ബാധ ഉണ്ടെന്ന സംശയത്തില് മന്ത്ര വാദവും ബാധ ഒഴിപ്പിക്കലും നടത്തിയ കുടുംബത്തിന്റെ ദിവസങ്ങളോളം നീണ്ടു നിന്ന പീഢനത്തിന് ഒടുവില് ഇരുപത്തി രണ്ടു കാരിയായ യുവതി കൊല്ലപ്പെട്ടു. കുടുംബാംഗങ്ങളായ ഒന്പത് പേരും ഇപ്പോള് പോലീസ് കസ്റ്റഡിയില് ആണ്. ന്യൂസീലാന്ഡിലെ വെല്ലിങ്ടണ് നഗരത്തിന് അടുത്താണ് സംഭവം. ജാനെറ്റ് മോസസ് എന്ന യുവതിയുടെ മുത്തശ്ശി മരിച്ചതിനെ തുടര്ന്ന് സ്വഭാവത്തില് കാര്യമായ മാറ്റം അനുഭവപ്പെട്ടതാണ് യുവതിക്ക് പ്രേത ബാധയാണ് എന്ന സംശയം ഉയരാന് കാരണം. തുടര്ന്ന് “മകുട്ടു” എന്ന് ഇവിടങ്ങളില് അറിയപ്പെടുന്ന മന്ത്രവാദ ക്രിയ ചെയ്യാന് കുടുംബം തീരുമാനിച്ചു. ബാധ ഒഴിപ്പിക്കലിന്റെ ഭാഗമായി ഇവര് യുവതിയുടെ കൈ കാലുകള് കെട്ടിയിട്ടു. പ്രാര്ത്ഥനയും മറ്റുമായി തുടങ്ങിയ ബാധ ഒഴിപ്പിക്കല് ചടങ്ങ് ക്രമേണ ചൂട് പിടിക്കുകയും ഇവര് യുവതിയുടെ ചുറ്റും കൂടി നിന്ന് “ഒഴിഞ്ഞു പോ” എന്ന് ആക്രോശിക്കുകയും ചെയ്തു. പിന്നീട് ഓരോരുത്തരായി യുവതിയുടെ കണ്ണുകളില് വായ് അമര്ത്തി കണ്ണുകള് വലിച്ചെടുക്കാന് ശ്രമിച്ചു. കണ്ണുകളിലും വായിലും വെള്ളമൊഴിക്കുകയും ചെയ്തു. ഇത് ദിവസങ്ങളോളം തുടര്ന്നു എന്ന് പോലീസ് അറിയിച്ചു. അവസാനം യുവതി വെള്ളം കുടിച്ച് മരിക്കുകയായിരുന്നു എന്നാണ് പോസ്റ്റ് മോര്ട്ടം റിപ്പോര്ട്ട് സൂചിപ്പിക്കുന്നത്. Labels: കുറ്റകൃത്യം
- ജെ. എസ്.
( Tuesday, May 05, 2009 ) |
|
കപ്പിത്താനെ രക്ഷപ്പെടുത്തി
 സോമാലിയന് കടല് കൊള്ളക്കാര് ബന്ദി ആക്കിയിരുന്ന അമേരിക്കന് കപ്പിത്താനെ അമേരിക്കന് നാവിക സേന രക്ഷപ്പെടുത്തി. കപ്പിത്താനെ ബന്ദി ആക്കിയിരുന്ന കൊള്ളക്കാരെ അമേരിക്കന് സൈന്യം അകലെ നിന്നും വെടി വെച്ചിടുകയായിരുന്നു. കപ്പിത്താന്റെ ജീവന് അപകടത്തില് ആവുന്ന പക്ഷം കൊള്ളക്കാരെ ആക്രമിക്കാന് നേരത്തെ അമേരിക്കന് പ്രസിഡണ്ട് ബറക് ഒബാമ നാവിക സേനക്ക് അനുവാദം നല്കിയിരുന്നു. കൊള്ളക്കാരുമായും സോമാലിയയിലെ മുതിര്ന്നവരുമായും പലവട്ടം നടത്തിയ ചര്ച്ചകള് പരാജയപ്പെട്ടിരുന്നു. ഇതിനെ തുടര്ന്ന് ഇന്നലെ കൊള്ളക്കാര് തങ്ങളുടെ യന്ത്ര തോക്കുകള് കപ്പിത്താന് നേരെ ചൂണ്ടിയതോടെ സൈന്യത്തിലെ വിദഗ്ദ്ധരായ തോക്കു ധാരികള് കൊള്ളക്കാരെ ദൂരെ നിന്നു തന്നെ ഉന്നം വെച്ചു വീഴ്ത്തുകയായിരുന്നു.Labels: അമേരിക്ക, കുറ്റകൃത്യം
- ജെ. എസ്.
( Monday, April 13, 2009 ) |
|
കൊള്ളക്കാര് അമേരിക്കന് സൈന്യത്തിന് നേരെ വെടി തുടങ്ങി
 സോമാലിയന് കടല് കൊള്ളക്കാര് തടവില് ആക്കിയ അമേരിക്കന് കപ്പിത്താന് റിച്ചാര്ഡ് ഫിലിപ്സിനെ മോചിപ്പിക്കാന് അമേരിക്കന് നാവിക സേന നടത്തിയ ശ്രമം വീണ്ടും പാഴായി. നാവിക സേനയുടെ ബോട്ടിനു നേരെ കൊള്ളക്കാര് വെടി വെക്കുകയാണ് ഉണ്ടായത്. നാവിക സേനയുടെ സംഘം സഞ്ചരിച്ച റബ്ബര് ബോട്ട് ഇപ്പോഴും അവിടെ തന്നെ ചുറ്റി തിരിയുകയാണ്. കപ്പിത്താനെ മോചിപ്പിക്കാനുള്ള ശ്രമം തങ്ങള് ഉപേക്ഷിച്ചിട്ടില്ല. എന്നാല് കപ്പിത്താന് ഇപ്പോഴും സുരക്ഷിതനാണോ എന്ന് തങ്ങള്ക്ക് ഉറപ്പില്ല എന്നാണ് സൈന്യം പറയുന്നത്. അമേരിക്കന് നാവിക സേനയുടെ രണ്ട് യുദ്ധ കപ്പലുകള് ഇവിടെ എത്തിയിട്ടുണ്ട്. മൂന്നാമത്തെ കപ്പല് ഉടന് എത്തിച്ചേരും. കൊള്ളക്കാര് കപ്പിത്താനെ ബന്ദിയാക്കി വെച്ചിരിക്കുന്ന ലൈഫ് ബോട്ട് സോമാലിയന് തീരത്തേക്ക് നീങ്ങി കൊണ്ടിരിക്കുകയാണ്. ഇത് തടയുക എന്നതാണ് യുദ്ധ കപ്പലുകളുടെ പ്രാഥമികമായ ലക്ഷ്യം. കടല് കൊള്ളക്കാരുടെ ബോട്ട് തീരത്ത് എത്തിയാല് കപ്പിത്താനെ കൊള്ളക്കാര് അവരുടെ താവളത്തിലേക്ക് കൊണ്ടു പോകും. പിന്നീട് ഇവരുടെ താവളം കണ്ടെത്തി കപ്പിത്താനെ മോചിപ്പിക്കുക എന്നത് അത്യന്തം ദുഷ്കരം ആയിരിക്കും. Labels: അന്താരാഷ്ട്രം, അമേരിക്ക, കുറ്റകൃത്യം
- ജെ. എസ്.
( Sunday, April 12, 2009 ) |
|
സൊമാലിയന് കൊള്ളക്കാര് നിലപാടില് ഉറച്ചു നില്ക്കുന്നു
 കടല് കൊള്ളക്കാര് ബന്ദിയാക്കിയ കപ്പലിന്റെ കപ്പിത്താനെ രക്ഷപ്പെടുത്തുവാന് ഉള്ള അമേരിക്കന് നാവിക സേനയുടെ ശ്രമങ്ങള് തുടരുന്നുവെങ്കിലും ഇത്രത്തോളം ആയിട്ടും കൊള്ളക്കാര് തങ്ങളുടെ നിലപാടുകളില് ഉറച്ചു നില്ക്കുന്നത് സൈന്യത്തെ കുഴക്കുകയാണ്. കൊള്ളക്കാരുമായി മധ്യസ്ഥത പറയാന് അമേരിക്കന് ഫെഡറല് അന്വേഷണ സംഘടനയിലെ വിദഗ്ദ്ധരായ നെഗോഷിയേറ്റര്മാരെ തന്നെ സേന രംഗത്തിറക്കിയിട്ടുണ്ട്. മര്സ്ക് അലബാമ എന്ന കപ്പല് സൊമാലിയന് കടല് കൊള്ളക്കാര് കഴിഞ്ഞ ബുധനാഴ്ച പിടിച്ചടക്കിയതിനെ തുടര്ന്ന് കപ്പലിലെ ഇരുപതോളം വരുന്ന അമേരിക്കന് ജീവനക്കാര് കപ്പലിന്റെ നിയന്ത്രണം ബല പ്രയോഗത്തിലൂടെ തിരിച്ചു പിടിച്ചിരുന്നു. എന്നാല് തന്റെ കീഴ് ജീവനക്കാരുടെ സുരക്ഷിതത്വം ഉറപ്പാക്കിയ കപ്പലിന്റെ കപ്പിത്താന് ഈ തന്ത്രം വിജയിക്കുന്നതിനായി സ്വയം നാല് കൊള്ളക്കാരുടെ കൂടെ ഒരു ലൈഫ് ബോട്ടില് കയറുവാന് തയ്യറാവുകയായിരുന്നു. കപ്പലിന്റെ നിയന്ത്രണം ജീവനക്കാര്ക്ക് തിരികെ ലഭിച്ചെങ്കിലും കപ്പിഥാന് ഇപ്പോള് ഈ നാല് കൊള്ളക്കാരുടെ തടവില് ലൈഫ് ബോട്ടില് ആണ് ഉള്ളത്. ലൈഫ് ബോട്ട് ആണെങ്കില് കപ്പലില് നിന്നും അകന്ന് പോയി കൊണ്ടിരിക്കുകയുമാണ്. ചര്ച്ചകളില് കാര്യമായ പുരോഗതി ഒന്നും ഉണ്ടായിട്ടില്ല. കപ്പിത്താനെ വിട്ടാല് തങ്ങളെ അറസ്റ്റ് ചെയ്യും എന്ന് കൊള്ളക്കാര് വിശ്വസിക്കുന്നു. ഇവരെ സഹായിക്കാന് രണ്ട് ബോട്ടുകളിലായി കൂടുതല് കൊള്ളക്കാര് തിരിച്ചിട്ടുണ്ട് എന്നും റിപ്പോര്ട്ടുകള് ഉണ്ട്. പണം ലഭിച്ചാല് മാത്രമേ കപ്പിത്താനെ തങ്ങള് വിട്ടയക്കൂ എന്നാണ് കൊള്ളക്കാരുടെ നിലപാട്. Labels: അമേരിക്ക, കുറ്റകൃത്യം, ക്രമസമാധാനം
- ജെ. എസ്.
( Friday, April 10, 2009 ) |
|
ചിദംബരത്തിനും ഷൂ കൊണ്ടേറ്
 കേന്ദ്ര ആഭ്യന്തര മന്ത്രി പി. ചിദംബരത്തിനു നേരെ ഒരു സിക്ക് മാധ്യമ പ്രവര്ത്തകന് പത്ര സമ്മേളനത്തിനിടെ ഷൂ വലിച്ചെറിഞ്ഞു. 1984ല് നൂറ് കണക്കിന് സിക്കുകാരെ കശാപ്പ് ചെയ്ത കലാപം സൂത്രധാരണം ചെയ്തു എന്ന് ആരോപിക്കപ്പെട്ടിരുന്ന മുതിര്ന്ന കോണ്ഗ്രസ് നേതാവ് ജഗ്ദീഷ് ടൈറ്റ്ലറെ സി.ബി.ഐ. കുറ്റവിമുക്തം ആക്കിയ നടപടിയെ കുറിച്ച് താന് ചോദിച്ച ചോദ്യത്തിന് മന്ത്രി നല്കിയ ഉത്തരത്തില് കുപിതനായാണ് ഒരു ഹിന്ദി ദിനപത്രത്തിന്റെ റിപ്പോര്ട്ടര് ആയ ജര്ണൈല് സിങ് ചിദംബരത്തിനു നേരെ തന്റെ ഷൂ ഏറിഞ്ഞത്. എന്നാല്, തന്റെ നേരെ ഷൂ പറന്നു വരുന്നത് കണ്ട് ഒഴിഞ്ഞു മാറിയതിനാല് മന്ത്രിക്ക് ഏറ് കൊണ്ടില്ല. ഇയാളെ പിടിച്ച് പുറത്ത് കൊണ്ട് പോകൂ എന്ന് ആവശ്യപ്പെട്ട മന്ത്രി പക്ഷെ ഇയാളെ പതുക്കെ കൈകാര്യം ചെയ്യണം എന്ന് പോലീസിനോട് ആവശ്യപ്പെട്ടു. താന് ഇയാളോട് ക്ഷമിച്ചു എന്ന് പിന്നീട് ചിദംബരം അറിയിച്ച പശ്ചാത്തലത്തില് ഇയാള്ക്കെതിരെ പോലീസ് കേസെടുത്തിട്ടുണ്ടോ എന്ന് വ്യക്തമല്ല.ഇന്ത്യന് പ്രധാന മന്ത്രി ഇന്ദിരാ ഗാന്ധിയെ അവരുടെ രണ്ട് സിക്ക് മതക്കാരായ അംഗ രക്ഷകര് വെടി വെച്ചു കൊലപ്പെടുത്തിയതിനെ തുടര്ന്ന് കോണ്ഗ്രസ് പ്രവര്ത്തകര് തങ്ങളുടെ നേതാക്കളുടെ നേതൃത്വത്തില് സിക്ക് മതക്കാരെ തെരഞ്ഞു പിടിച്ച് കശാപ്പ് ചെയ്ത സംഭവം ഇന്ത്യന് ചരിത്രത്തിലെ ഒരു കറുത്ത അധ്യായമാണ്. Labels: ഇന്ത്യ, കുറ്റകൃത്യം, രാഷ്ട്രീയം
- ജെ. എസ്.
( Tuesday, April 07, 2009 ) |
|
വിഡ്ഢി ദിനത്തില് കോണ്ഫിക്കര് ആക്രമിക്കുമോ?
 കഴിഞ്ഞ വര്ഷം ഏറ്റവും അധികം കമ്പ്യൂട്ടറുകളെ ആക്രമിച്ച വയറസ് ആയ കോണ്ഫിക്കര് ഏപ്രില് ഒന്നിന് വന് നാശം വിതക്കും എന്ന് മാധ്യമങ്ങളില് റിപ്പോര്ട്ടുകള് വരുമ്പോഴും ഏപ്രില് ഒന്നിന് പ്രത്യേകിച്ച് ഒന്നും പ്രകടമാകില്ല എന്നാണ് ഈ രംഗത്തെ വിദഗ്ദ്ധര് അറിയിക്കുന്നത്. ബ്രിട്ടീഷ് പാര്ലമെന്റിന്റെ കമ്പ്യൂട്ടറുകളില് കയറി പറ്റിയതോടെയാണ് അടുത്ത ദിവസങ്ങളില് ഈ വൈറസ് ഇത്രയേറെ പ്രശസ്തമായത്. ഏറ്റവും ശക്തമായ സുരക്ഷാ സംവിധാനങ്ങള് നിലവിലുള്ള ഈ കമ്പ്യൂട്ടര് ശൃംഖലയില് പോലും കയറി പറ്റാന് കഴിഞ്ഞത് ഇതിന്റെ നിര്മ്മാതാക്കളുടെ വിജയവുമായി. ഒപ്പം സുരക്ഷാ സംവിധാനങ്ങളെ കൂടുതല് ജാഗ്രതയോടെ പരിപാലിക്കേണ്ടതിന്റെ ആവശ്യം എല്ലാവര്ക്കും ബോധ്യപ്പെടാന് ഒരു അവസരവും. ആന്റി വയറസ് പ്രോഗ്രാമുകളുടെ ശ്രദ്ധയില് പെടാതെ ഈ വയറസിന് ഒരു യു.എസ്.ബി. ഫ്ലാഷ് ഡ്രൈവില് നിന്നും നേരിട്ട് കമ്പ്യൂട്ടര് ശൃംഖലയിലേക്ക് കയറി പറ്റാന് ആവുന്നു എന്നുള്ളതാണ് ഇതിന്റെ ഒരു പ്രത്യേകത. കൊണ്ടു നടക്കുവാന് എളുപ്പവും ധാരാളം ശേഖരണ ശേഷിയുമുള്ള യു.എസ്.ബി. ഫ്ലാഷ് ഡ്രൈവുകള് വഴിയാണ് ഈ വയറസ് കമ്പ്യൂട്ടറുകളെ ഏറ്റവും എളുപ്പം പകര്ന്ന് പിടിച്ചതും. മറ്റൊരു ശ്രദ്ധേയമായ വസ്തുത അനധികൃതമായ വിന്ഡോസ് ഉപയോക്താക്കളെയാണ് ഇത് ഏറ്റവും അധികം ബാധിച്ചത് എന്നതാണ്. സോഫ്റ്റ്വെയര് കൊള്ള (piracy) തടയാന് മൈക്രോസോഫ്റ്റ് ഇത്തരം അനധികൃത പകര്പ്പുകളെ ഏറ്റവും പുതിയ സുരക്ഷാ കൂട്ടിച്ചേര്ക്കലുകള് (security patches) സ്വീകരിക്കുന്നതില് നിന്നും തടഞ്ഞത് മൂലമാണ് ഇത്. സ്വന്തം കമ്പ്യൂട്ടറുകള് ശരിയായ വിധം അപ്ഡേറ്റ് ചെയ്യാത്തവര്ക്കും ഇത് വിനയായി. അത്തരം കമ്പ്യൂട്ടറുകളെയാണ് ഈ വയറസ് ഏറ്റവും അധികം ബാധിച്ചത്. ലോകമാകമാനം 12 മില്ല്യണിലേറെ കമ്പ്യൂട്ടറുകളെ ഇതിനോടകം ബാധിച്ചു കഴിഞ്ഞ ഈ വയറസിനെ നമുക്ക് തള്ളി കളയാന് ആവില്ല. ഇതിന്റെ നാശം വിതക്കാന് ഉള്ള കഴിവും അപാരമാണ്. എന്നാല് ഇപ്പോള് തന്നെ ഇത് ചെയ്യുവാന് ഉള്ള കഴിവ് ഈ വയറസിന്റെ നിര്മ്മാതാക്കള്ക്ക് ഉണ്ട്. അത് കൊണ്ട് തന്നെ ഏപ്രില് ഒന്നിന് ഇതിന്റെ സ്വഭാവത്തില് വരുന്ന മാറ്റങ്ങള് ഇതിനെ കൂടുതല് നശീകരണത്തിന് പ്രാപ്തമാക്കില്ല എന്നാണ് വിദഗ്ദ്ധരുടെ അഭിപ്രായം. ഇതിനെ തടയുവാന് ഉള്ള ശ്രമങ്ങളെ ചെറുക്കുവാന് മാത്രമെ ഈ വയറസിന് വരുന്ന മാറ്റങ്ങള് ഉതകൂ. ഇത് വരുത്തുന്ന നാശം എപ്പോള് വേണമെങ്കിലും ഇതിന്റെ നിര്മ്മാതാക്കള്ക്ക് കൂട്ടുകയോ അതിന്റെ ആക്രമണ സ്വഭാവത്തില് മാറ്റങ്ങള് വരുത്തുകയോ ചെയ്യാനാവും. നിങ്ങളുടെ കമ്പ്യൂട്ടറില് വയറസ് ഉണ്ടെങ്കില് നിങ്ങള്ക്ക് മൈക്രോസോഫ്റ്റിന്റെ വെബ്സൈറ്റ് സന്ദര്ശിക്കാന് കഴിയില്ല. അത് പോലെ തന്നെ മറ്റ് അനേകം ആന്റി വയറസ് സൈറ്റുകളിലേക്കും ഉള്ള പ്രവേശനം ഈ വയറസ് മുടക്കും. ഈ വയറസിനെ നശിപ്പിക്കാനും നിങ്ങളുടെ കമ്പ്യൂട്ടര് വയറസ് വിമുക്തമാക്കാനും ഉള്ള നിര്ദ്ദേശങ്ങള് ഇവിടെ ലഭ്യമാണ്. എന്നാല് ഈ സൈറ്റിലേക്കുള്ള പ്രവേശനവും വയറസ് നിരോധിച്ചിട്ടുണ്ട്. ഈ സൈറ്റ് നിങ്ങള്ക്ക് സന്ദര്ശിക്കാന് ആവുന്നുണ്ടെങ്കില് നിങ്ങളുടെ കമ്പ്യൂട്ടറില് വയറസ് ഇല്ല എന്ന് നിങ്ങള്ക്ക് മിക്കവാറും ഉറപ്പിക്കാം മൈക്രോസോഫ്റ്റിന്റെ സൈറ്റില് ലഭ്യമായ ഈ പ്രോഗ്രാം ഉപയോഗിച്ച് നിങ്ങള്ക്ക് നിങ്ങളുടെ കമ്പ്യൂട്ടറിലുള്ള കോണ്ഫിക്കറിനെ നശിപ്പിക്കാം. ഈ വയറസിനെതിരെ ലഭ്യമായ മറ്റ് രണ്ട് പ്രോഗ്രാമുകള് ഇവിടെയും ഇവിടെയും ഉണ്ട്. ഈ വയറസിന്റെ പ്രവര്ത്തനത്തെ സൂക്ഷ്മമായി പഠിച്ച ഒരു വിയറ്റ്നാം സുരക്ഷാ കമ്പനി ഇതിന്റെ ഉല്ഭവം ചൈനയില് നിന്നാണ് എന്ന് അറിയിക്കുന്നു. അവര് സൌജന്യമായി ലഭ്യമാക്കിയ ആന്റിവയറസ് പ്രോഗ്രാം ഇവിടെ ലഭ്യമാണ്. Labels: ഇന്റര്നെറ്റ്, ഐ.ടി, കുറ്റകൃത്യം
- ജെ. എസ്.
( Tuesday, March 31, 2009 ) |
|
ചൈനയില് നിന്നും സൈബര് യുദ്ധം
 103 രാജ്യങ്ങളിലെ തന്ത്ര പ്രധാന കമ്പ്യൂട്ടറുകളെ ആക്രമിച്ചു കീഴടക്കിയ ഒരു വമ്പന് ചൈനീസ് സൈബര് ചാര ശൃംഖല കണ്ടെത്തി. കാനഡയിലെ ടൊറോണ്ടോയിലെ മങ്ക് അന്താരാഷ്ട്ര പഠന കേന്ദ്രം പത്ത് മാസത്തോളം നടത്തിയ അന്വേഷണങ്ങളുടെ ഫലമായാണ് ചൈനയില് നിന്നും പ്രവര്ത്തിക്കുന്ന ഗോസ്റ്റ്നെറ്റ് എന്ന പേരില് അറിയപ്പെടുന്ന ഈ ചാര ശൃംഖല കണ്ടെത്തിയത്. ആഴ്ച തോറും ഒരു ഡസന് പുതിയ കമ്പ്യൂട്ടറുകള് എങ്കിലും ഈ ആക്രമണത്തില് കീഴടങ്ങുന്നു എന്നും ഇവര് വെളിപ്പെടുത്തി. ഇങ്ങനെ കീഴടക്കിയ കമ്പ്യൂട്ടറുകള് മിക്കവയും സര്ക്കാരുകളുടേയും മന്ത്രാലയങ്ങളുടേയും എംബസ്സികളുടേയും മറ്റും ആണ് എന്നത് പ്രശ്നത്തെ അതീവ ഗുരുതരമാക്കുന്നു.ഇത്തരത്തില് കീഴടക്കിയ കമ്പ്യൂട്ടറുകള് ഈ കമ്പ്യൂട്ടറുകളില് നിന്നുമുള്ള ഈമെയില് സന്ദേശങ്ങള് ചൈനയിലേക്ക് പകര്ത്തി കൊടുക്കുന്നു. മാത്രവുമല്ല ഇത്തരം കമ്പ്യൂട്ടറുകളിലെ മൈക്കും വെബ് കാമറയും ആരുമറിയാതെ പ്രവര്ത്തിപ്പിച്ച് ഒരു സമ്പൂര്ണ്ണ നിരീക്ഷണ കേന്ദ്രമാക്കി ഇത്തരം കമ്പ്യൂട്ടറുകളെ ഇവര് ഉപയോഗപ്പെടുത്തുകയും ചെയ്യുന്നു. കമ്പ്യൂട്ടറിന്റെ അടുത്തു വെച്ചു നടക്കുന്ന എല്ലാ സംഭാഷണങ്ങളും ഇവ റിക്കോഡ് ചെയ്ത് ചൈനയിലേക്ക് അയച്ചു കൊടുക്കുകയും ചെയ്യും. ഈ ചാര സംഘത്തിനു പിന്നില് ചൈനയിലെ സര്ക്കാരിനു പങ്കുണ്ടോ എന്നു വ്യക്തമല്ലെങ്കിലും ആക്രമണത്തിനു വിധേയമായ കമ്പ്യൂട്ടറുകളില് മിക്കതും വിദേശ സര്ക്കാരുകളുടേതാണ്. 1295 കമ്പ്യൂട്ടറുകള് ചൈനീസ് അധീനതയില് ആയിട്ടുണ്ടെന്നാണ് ഇപ്പോഴത്തെ നിഗമനം. അമേരിക്ക, ബെല്ജിയം, ഇറ്റലി, ജര്മനി എന്നിവിടങ്ങളിലെ ഇന്ത്യന് എംബസ്സികള്, സൈപ്രസിലേയും ബ്രിട്ടനിലേയും ഇന്ത്യന് ഹൈക്കമ്മീഷനുകള്, നാഷണല് ഇന്ഫൊര്മാറ്റികസ് സെന്റര്, ഇന്ത്യയിലെ വിവിധ സോഫ്റ്റ്വെയര് ടെക്നോപാര്ക്കുകള്, ഇന്ത്യയിലേക്ക് പലായനം ചെയ്ത തിബത്ത് സര്ക്കാരിന്റെയും ദലായ് ലാമയുടേയും കമ്പ്യൂട്ടറുകള് എന്നിവ ഇതില് ഉള്പ്പെടുന്നു. ദലായ് ലാമയുടെ കമ്പ്യൂട്ടര് ആക്രമിക്കപ്പെട്ടിരിക്കുന്നു എന്ന സംശയത്തില് നിന്നാണ് ഗോസ്റ്റ്നെറ്റിനെ കുറിച്ചുള്ള അന്വേഷണം ആരംഭിക്കുന്നത്. ദലായ് ലാമ ഒരു വിദേശ നയതന്ത്രജ്ഞന് അയച്ച ഒരു ക്ഷണ പത്രം ചോര്ന്നതായി സംശയം പ്രകടിപ്പിച്ച് ചില കമ്പ്യൂട്ടര് വിദഗ്ദ്ധരെ ബന്ധപ്പെടുകയായിരുന്നു. ദലായി ലാമ ക്ഷണ പത്രം അയച്ച ഉടന് ചൈനീസ് പ്രതിനിധികള് പ്രസ്തുത വിദേശ നയതന്ത്ര ഉദ്യോഗസ്ഥനെ സമീപിക്കുകയും ലാമയെ സന്ദര്ശിക്കരുത് എന്ന് ആവശ്യപ്പെടുകയും ചെയ്തു. ഇതാണ് ലാമക്ക് സംശയം തോന്നുവാനുള്ള കാരണം. ലാമയുടെ ആവശ്യ പ്രകാരം അമേരിക്കയിലെ വിദഗ്ദ്ധര് ഇന്ത്യയിലെ ധര്മ്മശാലയില് എത്തുകയും ലാമയുടെ കമ്പ്യൂട്ടര് പരിശോധിക്കുകയും ചെയ്തു. പരിശോധനയില് കമ്പ്യൂട്ടറില് ചൈനയില് നിന്നും അതിക്രമിച്ചു കയറിയിരിക്കുന്നു എന്ന് മനസ്സിലായി. അഭയാര്ത്ഥികളെ കുറിച്ചും വിദ്യാലയങ്ങളെ കുറിച്ചും ഉള്ള ഒട്ടേറെ വിവരങ്ങള് ഈ കമ്പ്യൂട്ടറില് ഉണ്ടായിരുന്നു. ഇതത്രയും തന്നെ ചൈനക്ക് തിബത്തിനെതിരെ ആക്രമണത്തിനുള്ള ലക്ഷ്യങ്ങളും ആയിരുന്നു. ഇതേ തുടര്ന്നു നടന്ന അന്വേഷണത്തിലാണ് ഗോസ്റ്റ്നെറ്റ് എന്ന ചൈനീസ് സൈബര് ചാര ശൃംഖല പുറത്തായത്. 2003ല് നടന്ന നാഷണല് പീപ്ള്സ് കോണ്ഗ്രസില് ചൈനീസ് പട്ടാളം സൈബര് യുദ്ധ യൂണിറ്റുകള് രൂപീകരിക്കും എന്ന് പ്രഖ്യാപിച്ചിരുന്നു. ഏത് യുദ്ധത്തിനു മുന്നോടിയായും ഇന്റര്നെറ്റ് യുദ്ധം നടത്തി ശത്രു പക്ഷത്തെ ദുര്ബലപ്പെടുത്തും എന്ന് അന്ന് ജനറല് ഡായ് ഖിങ്മിന് പ്രഖ്യാപിക്കുകയും ചെയ്തിരുന്നു. എന്നാല് ഇതെല്ലാം വെറും കെട്ടു കഥകള് ആണെന്നും ചൈന ഇത്തരം സൈബര് കുറ്റ കൃത്യങ്ങള്ക്ക് എതിരാണെന്നും ചൈനീസ് അധികൃതര് അറിയിച്ചിട്ടുണ്ട്. Labels: അന്താരാഷ്ട്രം, ഇന്റര്നെറ്റ്, കുറ്റകൃത്യം, യുദ്ധം, രാജ്യരക്ഷ
- ജെ. എസ്.
( Monday, March 30, 2009 ) |
|
സൌമ്യ കൊലക്കേസ് പ്രതികള് പിടിയില്
 മലയാളി മാധ്യമ പ്രവര്ത്തക സൌമ്യ വിശ്വനാഥ് കൊലക്കേസിന്റെ ചുരുളഴിഞ്ഞു. ദില്ലിയിലെ നെത്സണ് മണ്ഡേലാ മാര്ഗില് കഴിഞ്ഞ സെപ്റ്റംബര് 30 നാണ് ഓഫീസില് നിന്നും തിരികെ വീട്ടിലേക്ക് പോകുന്ന വഴി സൌമ്യ തന്റെ കാറില് വെച്ചു തലയില് വെടിയേറ്റ് കൊല്ലപ്പെട്ടത്. നേരത്തെ സി.എന്.എന്. ഐ.ബി.എന് ഇല് പ്രവര്ത്തിച്ചിരുന്ന സൌമ്യ കൊല്ലപ്പെടുമ്പോള് ദില്ലി ആസ്ഥാനമായി പ്രവര്ത്തിക്കുന്ന ഹെഡ്ലൈന്സ് ടുഡേയില് ഒരു ടെലിവിഷന് പ്രൊഡ്യൂസര് ആയിരുന്നു. ആദ്യം ഇതൊരു അപകട മരണമാണ് എന്നായിരുന്നു കരുതപ്പെട്ടിരുന്നത്. വഴി തെറ്റി വന്ന ഒരു ബുള്ളറ്റ് കോണ്ടതാവും എന്നും പോലീസ് കരുതിയിരുന്നു. എന്നാല് പിന്നീട് നടന്ന ഫോറന്സിക് പരിശോധനയില് സൌമ്യയുടെ തലമുടിയും ശിരോചര്മവും പുറകിലത്തെ സീറ്റില് കാണപ്പെട്ടു. അതോടെ ഇത് ഒരു കരുതി കൂട്ടിയുള്ള കൊലപാതകം ആണെന്ന് വ്യക്തമായി. എന്നാല് കൊലപാതകത്തിനു പിന്നിലെ ഉദ്ദേശം എന്തെന്ന് വ്യക്തമല്ല. സൌമ്യയുടെ അച്ചന് എം. കെ. വിശ്വനാഥനും ഇതേ കുറിച്ച് ഒന്നും പറഞ്ഞിട്ടില്ല.മറ്റൊരു കൊലപാതക കേസിന്റെ അന്വേഷണത്തിലാണ് സൌമ്യയുടെ ഘാതകരെ കുറിച്ച് പോലീസിന് വിവരം ലഭിച്ചത്. കഴിഞ്ഞ ആഴ്ച ദില്ലിയിലെ വസന്ത് വിഹാറില് വെച്ചു കൊല്ലപ്പെട്ട ജിഗിഷാ ഘോഷിന്റെ ആക്രമിച്ചതിനു ശേഷം ഇവരുടെ എ.റ്റി.എം. കാര്ഡ് ഉപയോഗിച്ച് പണം പിന്വലിച്ച ആക്രമികളുടെ ചിത്രം ബാങ്കിന്റെ ക്ലോസ്ഡ് സര്ക്യൂട്ട് ടി.വി.യില് പതിഞ്ഞിരുന്നു. ഇതാണ് ഘാതകരെ പിടി കൂടാന് പോലീസിനെ സഹായിച്ചത്. അറസ്റ്റിലായ നാലു പേരെ ചോദ്യം ചെയ്തപ്പോഴാണ് ഇവര് തന്നെയാണ് സൌമ്യയേയും കൊലപ്പെടുത്തിയത് എന്ന് മനസ്സിലായത്. മലയാളിയായ സൌമ്യ വിശ്വനാഥന് ജനിച്ചത് കേരളത്തിലാണെങ്കിലും വളര്ന്നത് ദില്ലിയിലാണ്. അഛന് എം.കെ.വിശ്വനാഥന് ദില്ലിയില് വോള്ട്ടാസ് കമ്പനിയില് ഉദ്യോഗസ്ഥനായിരുന്നു. Labels: കുറ്റകൃത്യം, ക്രമസമാധാനം
- ജെ. എസ്.
( Tuesday, March 24, 2009 ) |
|
സിറിഞ്ച് വേട്ട : 15 ഡോക്ടര്മാര് പിടിയില്
 അഹമ്മദാബാദില് പോലീസ് ആരോഗ്യ വകുപ്പ് ഉദ്യോഗസ്ഥരും കോര്പ്പൊറേഷന് അധികൃതരുമായി ചേര്ന്ന് നടത്തിയ സിറിഞ്ച് വേട്ടയില് 10,000 കിലോഗ്രാം ഉപയോഗിച്ച സിറിഞ്ചുകള് പിടിച്ചെടുത്തു. നഗരത്തിലെ സ്വകാര്യ ആശുപത്രികളിലും ഗോഡൌണുകളിലും വെള്ളിയാഴ്ച നടത്തിയ റെയിഡില് ആണ് ഞെട്ടിപ്പിക്കുന്ന ഈ കണ്ടെത്തല്. ഇതിനെ തുടര്ന്ന് പതിനഞ്ച് സ്വകാര്യ ആശുപത്രികള് അടച്ചു പൂട്ടി സീല് ചെയ്തു. ഇന്ത്യന് പീനല് കോഡിലെ വിവിധ വകുപ്പുകള് പ്രകാരം 15 ഡോക്ടര്മാര്ക്കെതിരെ കുറ്റം ചുമത്തിയിട്ടുണ്ടെങ്കിലും അറസ്റ്റ് ഒന്നും ഇതു വരെ നടന്നിട്ടില്ല. കൂടുതല് അന്വേഷണം നടത്തി ഇവരെ അറസ്റ്റ് ചെയ്യും എന്നാണ് സൂചന.നഗരത്തിലെ ഗോഡൌണുകളിലും ആക്രി കച്ചവടക്കാരുടെ കേന്ദ്രങ്ങളിലും പരിശോധന നടത്തിയ പോലീസ് സംഘം അഞ്ച് ഗോഡൌണുകളും സീല് ചെയ്തിട്ടുണ്ട്. വന് തോതില് ബയോ മെഡിക്കല് വേസ്റ്റ് ഇവിടങ്ങളില് കണ്ടെത്തി. ഹെപാറ്റൈറ്റിസ് പടര്ന്നു പിടിച്ച സ്ഥലങ്ങളില് നിന്ന് ഈ ആക്രി കച്ചവടക്കാര് ഉപയോഗിച്ച സിറിഞ്ചുകളും സൂചികളും വാങ്ങി കൂട്ടി മറിച്ചു വില്ക്കുകയായിരുന്നു എന്ന് പോലീസ് അറിയിച്ചു. ആശുപത്രിയില് നിന്നും പുറന്തള്ളപ്പെടുന്ന ചണ്ടിയില് നിന്നും ഉപയോഗിച്ച സിറിഞ്ചുകളും സൂചികളും ശേഖരിച്ച് വൃത്തിയാക്കി പുതിയത് പോലെ പാക്ക് ചെയ്തു വീണ്ടും വില്പ്പനക്ക് വെക്കുന്ന ഒരു വന് സംഘം തന്നെ ഇവിടങ്ങളില് പ്രവര്ത്തിക്കുന്നു എന്നാണ് സൂചന. ഉപയോഗിച്ച സിറിഞ്ച് വീണ്ടും ഉപയോഗിക്കുന്നത് വഴി ഹെപാറ്റൈറ്റിസ് സി രോഗം പടരാനുള്ള സാധ്യത വളരെ കൂടുതല് ആണെന്ന് ഡോക്ടര്മാര് പറയുന്നു. കരളിനെ മാരകമായി ബാധിക്കുന്ന ഈ രോഗത്തിന്റെ ലക്ഷണങ്ങള് പ്രകടമാകാന് ചിലപ്പോള് വര്ഷങ്ങള് തന്നെ വേണ്ടി വരും എന്നത് ഈ വിപത്തിനെ കൂടുതല് ഗൌരവം ഉള്ളത് ആക്കുന്നു. ഇത്തരക്കാരുടെ പ്രവര്ത്തികള് ശ്രദ്ധിക്കപ്പെടാതെ പോകുവാനും ഇത് കാരണം ആകുന്നു. ആശുപത്രി ചണ്ടിയില് ഉപയോഗിച്ച സിറിഞ്ചുകളും സൂചികളും രക്തം പുരണ്ട ഗ്ലാസ് സ്ലൈഡുകളും അലൂമിനിയം ഫോയലുകളും പരിശോധനകള്ക്കായി രക്തം ശേഖരിച്ച കുപ്പികളും മറ്റും ഉണ്ടാവും. ഇവയില് മിക്കതും രോഗങ്ങള് പരത്തുവാന് ശേഷിയുള്ളതും ആവും. ഉയര്ന്ന താപനിലയില് ചൂടാക്കിയാല് പോലും ഇതില് പകുതി പോലും നിര്വീര്യം ആവില്ല എന്നാണ് വിദഗ്ധര് പറയുന്നത്. ഇവ നിര്വീര്യമാക്കുവാന് വളരെ ഉയര്ന്ന ചൂടില് കത്തിക്കുവാന് ആശുപത്രികളില് ഇന്സിനറേറ്റര് സ്ഥാപിച്ച് ഇവ കത്തിച്ചു കളഞ്ഞതിനു ശേഷം ഇവ ഭൂമിക്കടിയില് വളരെ ആഴത്തില് കുഴിച്ചിടുകയാണ് വേണ്ടത്. എന്നാല് ഇത്തരം ഒരു ചണ്ടി സംസ്ക്കരണ പദ്ധതിയൊന്നും പലയിടത്തും പ്രവര്ത്തിക്കുന്നില്ല. ഇതൊന്നും അധികൃതര് കണ്ടതായി ഭാവിക്കുന്നുമില്ല. പല ആശുപത്രികളും തങ്ങള് ഉല്പ്പാദിപ്പിക്കുന്ന ചണ്ടി പൊതു സ്ഥലങ്ങളിലും, ഒഴിഞ്ഞ പറമ്പുകളിലും, റോഡരികിലും മറ്റും ഉപേക്ഷിക്കുകയാണ് പതിവ്. ഇത് മൂലം ചര്മ്മ രോഗങ്ങളും കോളറ, ടൈഫോയ്ഡ്, ഗാസ്റ്ററോ എന്ററൈറ്റിസ്, ക്ഷയം, ഡിഫ്തീരിയ എന്നീ രോഗങ്ങളും എയ്ഡ്സ് പോലും പകരുവാനും ഇടയാകുന്നു. ഇത്തരം ചണ്ടി ആഴത്തില് കുഴിച്ചിടാത്തതു മൂലം മഴക്കാലത്ത് ഇത് മഴ വെള്ളത്തില് കലര്ന്ന് ഭൂഗര്ഭ കുടി വെള്ള പൈപ്പുകളില് കടന്ന് കൂടുകയും ചെയ്യുന്നു. ഇത് ഉണ്ടാക്കാവുന്ന വിപത്ത് അചിന്തനീയം ആണ്. Labels: ആരോഗ്യം, കുറ്റകൃത്യം
- ജെ. എസ്.
( Friday, February 27, 2009 ) |
|
ബലാത്സംഗ ശ്രമം എതിര്ത്ത പെണ്കുട്ടിയെ മര്ദ്ദിച്ചു
 ഉത്തര് പ്രദേശിലെ ചൊക്കട എന്ന ഗ്രാമത്തില് തന്റെ എണ്ണ ചക്കില് ജോലിക്ക് എത്തിയ പ്രായ പൂര്ത്തി ആകാത്ത പെണ്കുട്ടിയെ മില്ലുടമയായ ഇക്രം എന്നയാള് മറ്റ് രണ്ടു പേരും കൂടി ചേര്ന്ന് ബലാത്സംഗം ചെയ്യാന് ശ്രമിക്കുകയും കുട്ടി എതിര്ത്തതിനെ തുടര്ന്ന് കുട്ടിയെ മര്ദ്ദിച്ച് അവശയാക്കുകയും ചെയ്തു. ഇതിനോടനുബന്ധിച്ച് ഒരാളെ പോലീസ് അറസ്റ്റ് ചെയ്തു. രണ്ട് പ്രതികളെ ഇനിയും പിടികൂടുവാന് കഴിഞ്ഞിട്ടില്ല. പെണ്കുട്ടി ആശുപത്രിയില് ചികിത്സയിലാണ്. കഴിഞ്ഞയാഴ്ച പതിനാല് കാരിയായ മറ്റൊരു പെണ്കുട്ടി ബലാത്സംഗ ശ്രമത്തെ തുടര്ന്ന് ഉത്തര് പ്രദേശിലെ തന്നെ ചന്ദ്പുര് ഗ്രാമത്തില് കൊല്ലപ്പെട്ടിരുന്നു. കുട്ടിയെ രക്ഷിക്കാന് ശ്രമിച്ച അമ്മൂമ്മക്ക് മര്ദ്ദനം ഏല്ക്കുകയും ചെയ്തിരുന്നു. ദളിതര്ക്കെതിരെ ഇത്തരം അക്രമങ്ങള് ഇവിടെ സാധാരണം ആണെന്ന് ഒരു ഗ്രാമവാസി മാധ്യമങ്ങളോട് പറഞ്ഞു.പാക്കിസ്ഥാനില് സ്ത്രീകളുടെ നേരെ നടക്കുന്ന അക്രമങ്ങള് Labels: കുട്ടികള്, കുറ്റകൃത്യം, പീഢനം
- ജെ. എസ്.
( Thursday, January 15, 2009 ) |
|
അധ്യാപകന് കണ്ണ് കുത്തി പൊട്ടിച്ചു
തന്റെ ചോദ്യത്തിന് ഉത്തരം നല്കുവാന് കഴിയാഞ്ഞതില് കുപിതനായ അധ്യാപകന് എട്ടു വയസുകാരിയായ വിദ്യാര്ത്ഥിനിയുടെ കണ്ണില് പിന്ന് കുത്തി കയറ്റി പൊട്ടിച്ചു. ശ്വേത എന്ന കുട്ടിയെ ഉടന് തന്നെ ആശുപത്രിയില് എത്തിച്ചെങ്കിലും കുട്ടിയുടെ വലത് കണ്ണിന്റെ കാഴ്ച പൂര്ണ്ണമായും നഷ്ടപ്പെട്ടതായി ഡോക്ടര്മാര് അറിയിച്ചു. ഛത്തീസ്ഗഢിലെ കോര്ബയില് സരസ്വതി ശിശു മന്ദിര് സ്കൂളില് രണ്ടാം ക്ലാസ്സിലാണ് സംഭവം നടന്നത്. പരസ്രാം ഭൈന എന്ന അധ്യാപകനാണ് തന്റെ ചോദ്യത്തിന് മറുപടി നല്കാഞ്ഞ വിദ്യാര്ത്ഥിനിയെ മര്ദ്ദിക്കുകയും കോപം സഹിക്കാനാവതെ കയ്യില് കിട്ടിയ ഒരു പിന്ന് കോണ്ട് കുട്ടിയുടെ കണ്ണ് കുത്തി പൊട്ടിക്കുകയും ചെയ്തത്. പോലീസ് കേസ് എടുത്തിട്ടുണ്ട്. അധ്യാപകന് ഒളിവിലുമാണ്.
Labels: ഇന്ത്യ, കുട്ടികള്, കുറ്റകൃത്യം
- ജെ. എസ്.
( Friday, January 09, 2009 ) |
|
കന്യാസ്ത്രീ പ്രതികളെ തിരിച്ചറിഞ്ഞു
 വിശ്വ ഹിന്ദു പരിഷദ് നേതാവ് ലക്ഷ്മണാനന്ദ സരസ്വതി വെടിയേറ്റ് കൊല്ലപ്പെട്ടതിനെ തുടര്ന്ന് ഒറീസ്സയില് നടന്ന ബന്ദിനിടയില് വര്ഗ്ഗീയ കലാപകാരികളാല് മാന ഭംഗം ചെയ്യപ്പെട്ട കന്യാസ്ത്രീ പോലീസ് നടത്തിയ തിരിച്ചറിയല് പരേഡില് രണ്ടു പ്രതികളെ തിരിച്ചറിഞ്ഞു. ഇരുപത്തി ഒന്പത് കാരിയായ കത്തോലിക്ക സന്യാസിനിയെ കഴിഞ്ഞ വര്ഷം ഓഗസ്റ്റ് 25 നാണ് ഒറീസ്സയിലെ കന്ധമാലില് ഒരു പറ്റം ആളുകള് ചേര്ന്ന് ബലാത്സംഗം ചെയ്തത്. സംഭവവുമായി ബന്ധപ്പെട്ട് അറസ്റ്റിലായ പത്തോളം പേര്ക്ക് പുറമെ എണ്പത് പേര് വേറെയും ഉണ്ടായിരുന്നു പരേഡില്. ഇവരില് നിന്നാണ് തന്നെ ആക്രമിച്ച രണ്ടു പേരെ ഇവര് തിരിച്ചറിഞ്ഞത്. ശനിയാഴ്ച നടത്തുവാനിരുന്ന പരേഡ് മാധ്യമ ശ്രദ്ധ ഒഴിവാക്കുവാന് വേണ്ടിയാണ് തിങ്കളാഴ്ച നടത്തിയത് എന്ന് പോലീസ് അറിയിച്ചു.Labels: കുറ്റകൃത്യം, തീവ്രവാദം, പീഢനം, മനുഷ്യാവകാശം, സ്ത്രീ
- ജെ. എസ്.
( Tuesday, January 06, 2009 ) |
|
ഉത്തര് പ്രദേശില് രാഷ്ട്ര പതി ഭരണം വേണം - പസ്വാന്
ദളിതരെ കൊന്നൊടുക്കി എല്ലാ മുന് കാല റിക്കാര്ഡുകളും ഭേദിച്ച ഉത്തര് പ്രദേശിലെ മായാവതി സര്ക്കാരിനെ പിരിച്ചു വിട്ടു സംസ്ഥാനത്ത് രാഷ്ട്രപതി ഭരണം കൊണ്ടു വരണം എന്ന് ലോക് ജന ശക്തി പാര്ട്ടി നേതാവ് റാം വിലാസ് പസ്വാന് രാഷ്ട്ര പതിക്കു നല്കിയ നിവേദനത്തില് ആവശ്യപ്പെട്ടു. മായാവതിയുടെ ഭരണത്തിന് കീഴില് എം.എല്.എ. മാറും മന്ത്രിമാരും ഗുണ്ടാ വാഴ്ച നടത്തുകയാണ്. നിയമ വാഴ്ച നിലവില് ഇല്ലാത്ത സംസ്ഥാനത്ത് ജനങ്ങളുടെ ജീവന് സദാ ഭീഷണിയില് ആണ്. ഈ സര്ക്കാരിനെ പിരിച്ചു വിട്ടു ജനങ്ങള്ക്ക് ഭരണ സംവിധാനത്തില് ഉള്ള വിശ്വാസം നില നിര്ത്തണം എന്നും രാഷ്ട്ര പതിക്കു നല്കിയ നിവേദനത്തില് പസ്വാന് ആവശ്യപ്പെട്ടു. ലോക് ജന ശക്തി പാര്ട്ടി യുവ നേതാവ് മനീഷ് യാദവ്, പൊതു മരാമത്ത് വകുപ്പിലെ എഞ്ചിനീയര് മനോജ് ഗുപ്ത എന്നിവരുടെ കൊലപാതകത്തില് പ്രതിഷേധിച്ചു ലോക് ജന ശക്തി പ്രതിഷേധ മാര്ച്ച് നടത്തി. രണ്ടു കൊലപാതകങ്ങളും അന്വേഷിച്ചു അവയ്ക്ക് പിന്നില് പ്രവര്ത്തിച്ച ജന പ്രതിനിധികളെയും മായാവതിയുടെ പിറന്നാള് ആഘോഷവുമായി ബന്ധപ്പെട്ട് ബലമായി നടത്തിയ പണ പിരിവിനു പിന്നില് പ്രവര്ത്തിച്ചവരെയും നിയമത്തിനു മുന്പില് കൊണ്ടു വരണം എന്നും പ്രതിഷേധ മാര്ച്ചില് ആവശ്യപ്പെട്ടു.
Labels: കുറ്റകൃത്യം, പ്രതിഷേധം
- ജെ. എസ്.
( Tuesday, December 30, 2008 ) |
|
എന്ജിനിയറുടെ വധം : സി.ബി.ഐ. അന്വേഷണം ഇല്ല എന്ന് മായാവതി
 ഉത്തര് പ്രദേശില് പൊതു മരാമത്ത് വകുപ്പിലെ എഞ്ചിനീയര് ആയിരുന്ന മനോജ് ഗുപ്തയെ മര്ദ്ദിച്ചു കൊലപ്പെടുത്തിയ സംഭവത്തില് സി.ബി.ഐ. അന്വേഷണത്തിന്റെ ആവശ്യം ഇല്ലെന്നു മുഖ്യ മന്ത്രി മായാവതി പ്രസ്താവിച്ചു. തന്റെ പിറന്നാളുമായി ഈ സംഭവത്തെ ബന്ധപ്പെടുത്തി തന്റെ സര്ക്കാരിനെ അപകീര്ത്തി പ്പെടുത്താന് പ്രതിപക്ഷം ശ്രമിക്കുകയാണ്. ഈ കേസിലെ പ്രതികളെ തന്റെ നിര്ദ്ദേശ പ്രകാരം സംസ്ഥാന പോലീസ് അറസ്റ്റ് ചെയ്തു കഴിഞ്ഞ നിലക്ക് ഇനിയൊരു സി.ബി.ഐ. അന്വേഷണത്തിനു പ്രസക്തിയില്ല എന്നും മായാവതി അറിയിച്ചു.ഇതിനിടെ കൊല്ലപ്പെട്ട മനോജ് ഗുപ്തയുടെ പോസ്റ്റ്മോര്ട്ടം റിപ്പോര്ട്ട് മരണ കാരണം മര്ദ്ദനം ആണ് എന്ന് സ്ഥിരീകരിച്ചു. തലക്കും, നെഞ്ഞത്തും, വയറ്റത്തും മറ്റു ശരീര ഭാഗങ്ങളിലും മാരകായ മര്ദ്ദനം ഏറ്റിട്ടുണ്ട് എന്നാണു പോസ്റ്റ്മോര്ട്ടം റിപ്പോര്ട്ട്. കൊലപാതകികള് എന്ജിനിയറുടെ ശരീരത്തില് വൈദ്യുത ഷോക്ക് ഏല്പിച്ചു എന്ന ആരോപണത്തെ പറ്റി റിപ്പോര്ട്ടില് സൂചന ഇല്ല. ഇതുമായി ബന്ധപ്പെട്ട് പോലീസ് ബി. എസ്. പി. എം. എല്. എ. ശേഖര് തിവാരിയെയും കൂട്ടാളികളെയും ഇന്നലെ അറസ്റ്റ് ചെയ്തിരുന്നു. മായാവതിയുടെ പിറന്നാള് ആഘോഷത്തിനു സംഭാവന കൊടുക്കാന് കൊല്ലപ്പെട്ട എഞ്ചിനീയര് വിസമ്മതിച്ചതാണ് കൊലക്ക് കാരണം ആയത്. രാത്രിയില് വീടിന്റെ വാതിലില് ഉറക്കെ മുട്ടുന്ന ശബ്ദം കേട്ട താന് ഭര്ത്താവിനെ വിളിച്ചു ഉണര്ത്തുക ആയിരുന്നു എന്ന് സംഭവം വിശദീകരിച്ചു കൊണ്ടു കൊല്ലപ്പെട്ട മനോജിന്റെ ഭാര്യ ശശി പറയുന്നു. ആരാണ് മുട്ടുന്നത് എന്ന് മനോജ് ചോദിച്ചപ്പോള് സി. ഐ. ഡി. ആണെന്നായിരുന്നു മറുപടി. എന്തിനാണ് വന്നത് എന്ന് ചോദിച്ചപ്പോള് അവര് വാതില് ചവിട്ടി തുറന്നു. പെട്ടെന്ന് മനോജ് തന്നെ കുളിമുറിയില് കയറ്റി വാതില് വെളിയില് നിന്നും പൂട്ടി. വാതില് പൊളിച്ചു കയറി വന്ന അക്രമികള് തന്റെ ഭര്ത്താവിനെ പിടിച്ചു കൊണ്ടു പോവുകയും ചെയ്തു എന്ന് ശശി പറയുന്നു. ബി. എസ്. പി. എം. എല്. എ. ശേഖര് തിവാരിയുടെ ആള്ക്കാര് മനോജിന്റെ പക്കല് പതിനഞ്ച് ലക്ഷം രൂപയാണ് ആവശ്യപ്പെട്ടതത്രേ. എന്നാല് സംഭവവുമായി മുഖ്യ മന്ത്രിക്ക് ബന്ധമൊന്നും ഇല്ല എന്ന് സര്ക്കാര് വക്താവ് അറിയിച്ചു. പ്രതിയായ എം. എല്. എ. യുടെ പേരില് പന്ത്രണ്ടോളം കേസുകള് വേറെയും നിലവില് ഉണ്ടത്രേ. എന്നാല് ഇതിന് മുന്പും പിറന്നാള് പ്രമാണിച്ചു സമ്മാനങ്ങളും സംഭാവനകളും പാര്ട്ടിക്കാരുടെ പക്കല് നിന്നും മായാവതി വാങ്ങിച്ചിട്ടുണ്ട് എന്ന് റിപ്പോര്ട്ടുകള് സൂചിപ്പിക്കുന്നു. സംഭവത്തില് ഉത്തര് പ്രദേശിലെ എഞ്ചിനീയര് മാരുടെ സംഘടന അനിശ്ചിത കാല സമരം പ്രഖ്യാപിച്ചു. 25 ലക്ഷം രൂപ നഷ്ട പരിഹാരവും എഞ്ചിനീയര് മാരുടെ ജീവന് സുരക്ഷയുമാണ് സംഘടന ആവശ്യപ്പെട്ടിരിക്കുന്നത്. അഞ്ചു ലക്ഷം രൂപയും കൊല്ലപ്പെട്ട എന്ജിനിയറുടെ ഭാര്യക്ക് ജോലിയും ഇപ്പോള് വാഗ്ദാനം ചെയ്യപ്പെട്ടിട്ടുണ്ട്. സംഭവത്തില് പ്രതിഷേധിച്ചു സമാജ് വാദി പാര്ട്ടി ഉത്തര് പ്രദേശില് ഇന്നു ബന്ദിന് ആഹ്വാനം ചെയ്തു. Labels: കുറ്റകൃത്യം, പീഢനം, പ്രതിഷേധം
- ജെ. എസ്.
( Thursday, December 25, 2008 ) |
|
ജര്മന് ടൂറിസ്റ്റിനെ ബലാത്സംഗം ചെയ്യന് ശ്രമിച്ച യുവാവ് അറസ്റ്റില്
 കോഴിക്കോട് : അറുപത്തി നാല് കാരിയായ ഒരു ജര്മന് ടൂറിസ്റ്റിനെ ബലാത്സംഗം ചെയ്യാന് ശ്രമിച്ചതിന് കോഴിക്കോട്ട് പതിനെട്ട് വയസുള്ള യുവാവ് അറസ്റ്റിലായി. ലോക പ്രശസ്തമായ കാപ്പാട് കടപ്പുറത്ത് വെച്ചാണ് സംഭവം. ആക്രമണത്തിന് ഇരയായ സ്ത്രീ ബഹളം വെച്ചതിനെ തുടര്ന്ന് സ്ഥലത്ത് ഉണ്ടായിരുന്ന ടൂറിസ്റ്റ് പോലീസാണ് യുവാവിനെ അറസ്റ്റ് ചെയ്തത്. സംഭവത്തിന് ഇവരുടെ കൂടെ ഉണ്ടായിരുന്ന മറ്റൊരു ജര്മന് സ്വദേശി കൂടി സാക്ഷിയാണ്. അറസ്റ്റിലായ യുവാവിനെ തിങ്കളാഴ്ച കോടതിയില് ഹാജരാക്കും എന്ന് പോലീസ് അറിയിച്ചു.Labels: കുറ്റകൃത്യം, കേരളം
- ജെ. എസ്.
( Monday, December 15, 2008 ) |
|
മുംബൈ: ഭീകരര്ക്ക് സിം കാര്ഡ് നല്കിയവര് പിടിയില്
മുംബൈ ഭീകരാക്രമണവുമായി ബന്ധപ്പെട്ട് രണ്ട് ഇന്ത്യക്കാര് കൊല്ക്കത്ത പോലീസിന്റെ പിടിയിലായി. ശ്രീനഗര് സ്വദേശി മുഖ്താര് അഹമ്മദ് ശൈഖ്(35), കൊല്ക്കത്ത നിവാസി തൌസിഫ് റഹ്മാന്(26) എന്നിവരാണ് അറസ്റ്റിലായത്. വ്യാജ തിരിച്ചറിയല് കാര്ഡ് ഉപയോഗിച്ച് 22 സിംകാര്ഡുകള് വാങ്ങുകയും ഭീകരര്ക്ക് കൈ മാറുകയും ചെയ്തു എന്ന് പോലീസിന് തെളിവ് ലഭിച്ചിട്ടുണ്ട്. ഇവയില് ഒന്നായിരുന്നു അക്രമികള് ആക്രമണ സമയത്ത് ഉപയോഗിച്ചത്. ഈ സിംകാര്ഡുകള് ഇന്ത്യയില് നിന്നും പാകിസ്ഥാനിലേക്ക് അയച്ചു കൊടുത്തതായും വിവരം ലഭിച്ചിട്ടുണ്ട്.
Labels: blast, കുറ്റകൃത്യം, തീവ്രവാദം, മുംബൈ, രാജ്യരക്ഷ, സ്ഫോടനം
- ബിനീഷ് തവനൂര്
( Tuesday, December 09, 2008 ) |
|
ഒ.ജെ. സിംപ്സണ് 33 വര്ഷം ജയില് ശിക്ഷ
മുന് അമേരിക്കന് ഫുട്ബാള് താരം ഒ.ജെ.സിംപ്സണ്(61) 33 വര്ഷത്തെ ജയില് ശിക്ഷക്ക് വിധിക്കപ്പെട്ടു. തട്ടിക്കൊണ്ട് പോകല്, കായിക ഉപകരണ ഡീലേഴസിനെ കൊള്ളയടിക്കല് എന്നി കുറ്റങ്ങള്ക്കാണ് ശിക്ഷ. പ്രായാധിക്യം പരിഗണിച്ച് ഒമ്പത് വര്ഷങ്ങള്ക്ക് ശേഷം പരോള് അനുവദിക്കും. വിധിക്കെതിരെ സിംപ്സണ് അപ്പീല് നല്കിയെങ്കിലും പ്രയോചനമുണ്ടായില്ല. 1995ല് മുന് ഭാര്യയെ കൊന്ന കേസില് 33.5 മില്യണ് യു.എസ്. ഡോളര് പിഴ ശിക്ഷ കിട്ടിയ ആളാണ് സിംപ്സണ്. കോടതി വിധി സംതൃപ്തി തരുന്നെന്ന് ഗോള്ഡ്മന്റെ പിതാവ് അഭിപ്രായപ്പെട്ടു.
Labels: കുറ്റകൃത്യം, സ്പോര്ട്ട്സ്
- ബിനീഷ് തവനൂര്
( Monday, December 08, 2008 ) |
|
അഭയ: പ്രതികള് കുറ്റം സമ്മതിച്ചെന്ന് സി.ബി.ഐ
 സിസ്റ്റര് അഭയെ കൊലപ്പെടുത്തിയ കേസിലെ പ്രതികളായ ഫാ. തോമസ് കോട്ടൂര്, ഫാ. ജോസഫ് പുതൃക്കയില്, സിസ്റ്റര് സെഫി എന്നിവര് കുറ്റം സമ്മതിച്ചരായി സി. ബി. ഐ. എറണാകുളം സി. ജെ. എം. കോടതിയെ അറിയിച്ചു. തുടക്കത്തില് വിസമ്മതം പ്രകടിപ്പിച്ച പ്രതികള് സി. ബി. ഐ. മുന്പ് നടത്തിയിരുന്ന നാര്ക്കോ അനാലിസിസ്, ബ്രെയിന് മാപ്പിംഗ് എന്നിവയുടെ റിപ്പോര്ട്ടുകളുടെ സഹായത്തോ ടെയുള്ള ചോദ്യം ചെയ്യലില് കുറ്റം സമ്മതിക്കുക ആയിരുന്നു.സിസ്റ്റര് സെഫിയുടെ രേഖാ മൂലമുള്ള സമ്മതത്തോടെ ആണ് അവരെ കന്യകാത്വ പരിശോധനക്ക് വിധേയ ആക്കിയതെന്നും അഭയയുടെ ഇന്ക്വെസ്റ്റ് തയ്യാറാക്കിയ മുന് എ. എസ്. ഐ. അഗസ്റ്റിന്റെ ദൂരൂഹ മരണത്തെ കുറിച്ച് വിശദമായ അന്വേഷണം നടത്തണമെന്നും സി. ബി. ഐ. വ്യക്തമാക്കി. Labels: കുറ്റകൃത്യം, കേരളം, കോടതി, പോലീസ്
- ബിനീഷ് തവനൂര്
( Wednesday, December 03, 2008 ) |
|
കടല് കൊള്ള : ഇന്ത്യയുടെ ശ്രമങ്ങള്ക്ക് യു. എന്. പിന്തുണ
 സോമാലിയന് കടല് കൊള്ളക്കാരുടെ ഒരു കപ്പല് കഴിഞ്ഞ ദിവസം നടന്ന രൂക്ഷമായ യുദ്ധത്തിലൂടെ ഇന്ത്യ തകര്ത്ത നടപടിക്ക് ഐക്യ രാഷ്ട്ര സഭ ജെനറല് സെക്രട്ടറി ബെന് കി മൂണ് ശക്തമായ പിന്തുണ പ്രഖ്യാപിച്ചു. തങ്ങള് സോമാലിയന് സര്ക്കാരും, അന്താരാഷ്ട്ര നാവിക സംഘടനയും, നാറ്റോ, യൂറോപ്യന് യൂണിയന് എന്നിവരുമായി ചേര്ന്ന് പ്രവര്ത്തിച്ച് ഈ പ്രശ്നത്തിന് ഒരു അറുതി വരുത്താനുള്ള തീവ്ര ശ്രമത്തിലാണ്. അന്താരാഷ്ട്ര സമൂഹത്തിന്റെ കൂട്ടായ പരിശ്രമം ഇതിന് ആവശ്യമാണ്. ഇന്ത്യന് നാവിക സേനയുടെ പരിശ്രമങ്ങള് മറ്റുള്ള രാജ്യങ്ങള്ക്ക് മാതൃകയാവും. കൂടുതല് സൈന്യങ്ങള് ഈ ഉദ്യമത്തില് പങ്കു ചേരുന്നത് ഈ പ്രശ്നം എന്നെന്നേക്കുമായി പരിഹരിക്കുവാന് സഹായിക്കും എന്നും അദ്ദേഹം പ്രത്യാശ പ്രകടിപ്പിച്ചു.Labels: അന്താരാഷ്ട്രം, ഇന്ത്യ, കുറ്റകൃത്യം, ക്രമസമാധാനം
- ജെ. എസ്.
( Thursday, November 20, 2008 ) |
|
ഇന്ത്യന് നാവിക സേന കടല് കൊള്ളക്കാരുടെ കപ്പല് ആക്രമിച്ചു മുക്കി
 രൂക്ഷമായ കടല് യുദ്ധത്തിന് ശേഷം ഇന്ത്യന് നാവിക സേനയുടെ ഐ. എന്. എസ്. തബാര് എന്ന യുദ്ധ കപ്പല് സോമാലിയന് കടല് കൊള്ളക്കാരുടെ ഒരു മാതൃയാനം മുക്കി. കഴിഞ്ഞ ആഴ്ച്ച രണ്ട് ചരക്ക് കപ്പലുകള് ഇന്ത്യന് നാവിക സേന ഇതേ കടല് കൊള്ളക്കാരുടെ ആക്രമണത്തില് നിന്നും രക്ഷപ്പെടുത്തിയിരുന്നു. ഒമാനിലെ സലാലയില് നിന്ന് 285 നോട്ടിക്കല് മൈല് അകലെ ഇന്നലെ വൈകീട്ടാണ് നാവിക സേനയുടെ കപ്പല് കൊള്ളക്കാരുടെ കപ്പല് കണ്ടെത്തിയത്. ഇന്ത്യന് സേനയുടെ ഈ യുദ്ധ കപ്പല് കഴിഞ്ഞ ഏതാനും ദിവസങ്ങളായി കടല് കൊള്ളക്കാരുടെ ആക്രമണം ഉണ്ടായതിനെ തുടര്ന്ന് ഈ പ്രദേശത്ത് വിന്യസിച്ചിരിക്കുകയായിരുന്നു. കപ്പല് കണ്ടെത്തിയതിനെ തുടര്ന്ന് ഐ. എന്. എസ്. തബാര് കൊള്ളക്കാരുടെ കപ്പല് പരിശോധിക്കുവാനായി നിര്ത്തുവാന് ആവശ്യപ്പെട്ടു. എന്നാല് അതിനു വഴങ്ങാതെ കൊള്ളക്കാര് തിരിച്ച് ആക്രമിക്കുകയാണ് ഉണ്ടായത്. തോക്കുകളും ആയുധങ്ങളുമായി കടല് കൊള്ളക്കാര് കപ്പലിന്റെ ഡെക്കില് റോന്ത് ചുറ്റുന്നത് കാണാമായിരുന്നുവത്രെ. തങ്ങളുടെ കപ്പലിനു നേരെ ആക്രമണം ഉണ്ടായതിനെ തുടര്ന്ന് ഇന്ത്യന് സൈന്യവും ആക്രമണം ആരംഭിച്ചു. സേനയുടെ ആക്രമണത്തില് കൊള്ളക്കരുടെ കപ്പലില് സംഭരിച്ചു വെച്ചിരുന്ന സ്ഫോടക വസ്തുക്കള്ക്ക് തീ പിടിക്കുകയും വന് പൊട്ടിത്തെറിയോടെ കപ്പല് കടലില് മുങ്ങുകയും ഉണ്ടായി എന്ന് ഒരു നാവിക സേനാ വക്താവ് അറിയിച്ചു.Labels: അന്താരാഷ്ട്രം, ഇന്ത്യ, കുറ്റകൃത്യം, ക്രമസമാധാനം
- ജെ. എസ്.
( Wednesday, November 19, 2008 ) |
|
റാഞ്ചിയ കപ്പല് വിട്ടയച്ചു; ഇന്ത്യാക്കാര് സുരക്ഷിതര്
 രണ്ടു മാസം മുന്പ് കടല് കൊള്ളക്കാര് റാഞ്ചി കൊണ്ട് പോയ സ്റ്റോള് വാലര് എന്ന കപ്പല് കൊള്ളക്കാര് വിട്ടു കൊടുത്തു. പതിനെട്ട് ഇന്ത്യന് തൊഴിലാളികള് രണ്ടു മാസമായി ഈ കപ്പലില് കൊള്ളക്കാരുടെ തടവില് ആയിരുന്നു. കൊള്ളക്കാരുമായി ഉണ്ടാക്കിയ ഉടമ്പടി എന്തെന്ന് അധികൃതര് വെളിപ്പെടുത്തിയിട്ടില്ല. ഗള്ഫ് ഓഫ് ഏദനില് വെച്ച് രണ്ടു മാസം മുന്പാണ് ഈ കപ്പല് സോമാലിയന് കടല് കൊള്ളക്കാരുടെ പിടിയില് ആയത്. കപ്പല് തൊഴിലാളികളുടെ ദേശീയ സംഘടനയുടെ ചെയര്മാന് അബ്ദുള് ഗാനിയാണ് കപ്പല് വിട്ടു കിട്ടിയ കാര്യം അറിയിച്ചത്. കപ്പല് വിട്ടു കിട്ടുവാനായി നടത്തിയ ശ്രമങ്ങളില് ഇന്ത്യന് നാവിക സേന വഹിച്ച പങ്കിനെ അദ്ദേഹം പ്രകീര്ത്തിച്ചു. അപകട മേഖലയില് നിന്നും കപ്പലിനെ സുരക്ഷിതമായ താവളത്തിലേക്ക് ഉടന് മാറ്റും. മോചനദ്രവ്യം തീര്ച്ചയായും കൊടുത്തിട്ടുണ്ട്. എന്നാല് ഈ തുക എത്രയാണ് എന്ന് വെളിപ്പെടുത്താന് ആവില്ല എന്നും അദ്ദേഹം കൂട്ടിച്ചേര്ത്തു. കപ്പലിലെ നാവികര് അഞ്ചു ദിവസത്തിനകം മുംബയില് തിരിച്ചെത്തും.Labels: അന്താരാഷ്ട്രം, കുറ്റകൃത്യം, ക്രമസമാധാനം
- ജെ. എസ്.
( Sunday, November 16, 2008 ) |
|
അറബ് പൌരന് കോക്ക് പിറ്റില് അതിക്രമിച്ചു കയറി
കുവൈറ്റ് വിമാനത്താവളത്തില് സുരക്ഷാ ക്രമീകരണങ്ങള് മറി കടന്ന് അറബ് പൗരന് വിമാനത്തിന്റെ കോക്ക്പിറ്റില് പ്രവേശിച്ചു. ഒരു ബ്രസീലിയന് പൈലറ്റിന്റെ തിരിച്ചറിയല് കാര്ഡ് ഉപയോഗിച്ചാണ് ഇയാള് കോക്ക്പിറ്റില് കടന്നത്.
ഇയാളുടെ പെരുമാറ്റത്തില് സംശയം തോന്നിയ മറ്റ് ജോലിക്കാര് സുരക്ഷാ വിഭാഗത്തെ അറിയിച്ചതിനെ തുടര്ന്ന് ഇയാളെ അറസ്റ്റ് ചെയ്തു. സുരക്ഷാ പാളിച്ചയെക്കുറിച്ച് ഉന്നത തല അന്വേഷണം നടന്നു വരുന്നു. Labels: കുറ്റകൃത്യം, കുവൈറ്റ്, തീവ്രവാദം, വിമാന സര്വീസ്
- ജെ. എസ്.
( Sunday, September 28, 2008 ) |
|
പെണ് വാണിഭ കേന്ദ്രത്തില് നിന്ന് മലയാളി യുവതിയെ ചാനല് പ്രവര്ത്തകര് രക്ഷിച്ചു
 ദുബായില് പെണ് വാണിഭ കേന്ദ്രത്തില് അകപ്പെട്ട മലയാളി യുവതിയെ ഏഷ്യാനെറ്റ് ന്യൂസ് സംഘം രക്ഷപ്പെടുത്തി. ആയയുടെ ജോലി വാഗ്ദാനം ചെയ്ത് പറ്റിച്ചാണ് കൊല്ലം സ്വദേശിയായ ഈ യുവതിയെ പെണ് വാണിഭ കേന്ദ്രത്തില് എത്തിച്ചത്. ദുബായില് പെണ് വാണിഭ കേന്ദ്രത്തില് അകപ്പെട്ട മലയാളി യുവതിയെ രക്ഷിക്കണമെന്ന് ആവശ്യപ്പെട്ട് ഒരു ഫോണ് കോള് വന്നതോടെയാണ് അന്വേഷണം ആരംഭിച്ചത്. അന്വേഷണങ്ങള്ക്ക് ഒടുവില് പെണ്കുട്ടിയെ ഹമരിയയിലെ ഒരു വില്ലയില് താമസിപ്പിച്ചതായി വിവരം ലഭിച്ചു. ഈ വില്ലയിലെ ബോയിയെ ഫോണില് വിളിച്ച് കസ്റ്റമര് എന്ന വ്യാജേനെയാണ് മാധ്യമ സംഘം അവിടെ എത്തിയത്.പെണ്കുട്ടിയെ പുറത്തേക്ക് കൊണ്ടു പോകാന് അനുവദിക്കില്ലെന്ന് അവിടെ കാര്യങ്ങള് നോക്കി നടത്തുന്ന പോണ്ടിച്ചേരി സ്വദേശി പറഞ്ഞതോടെ പിന്നെ ബലം പ്രയോഗിക്കേണ്ടി വന്നു. വില്ലയിലെ ഓരോ മുറികളും തുറപ്പിച്ച് പെണ്കുട്ടിയെ താമസിപ്പിച്ച മുറി കണ്ടെത്തി രക്ഷപ്പെടുത്തുകയായിരുന്നു. ആയയുടെ ജോലി വാഗ്ദാനം ചെയ്ത് തന്റെ വീടിന് അടുത്തുള്ള ഒരു ആള് വഴി പരിചയപ്പെട്ട ഏജന്റ് ആണ് തന്നെ ദുബായിലെത്തിച്ചതെന്ന് കൊല്ലം ജില്ലക്കാരിയായ യുവതി പറഞ്ഞു. ദുബായില് എത്തി മൂന്ന് ദിവസത്തിനകം തന്നെ 23 കാരിയായ യുവതിയെ പെണ് വാണിഭത്തിന് ഉപയോഗിക്കുകയായിരുന്നു.  ഹമരിയയിലെ പെണ് വാണിഭ കേന്ദ്രത്തില് തങ്ങള് എത്തുമ്പോള് മറ്റ് മുറികളില് വേറെയും സ്ത്രീകള് ഉണ്ടായിരുന്നു എന്ന് സംഘത്തിന് നേതൃത്വം നല്കിയ ഏഷ്യനെറ്റ് ദുബായ് ബ്യൂറോയിലെ ഫൈസല് ബിന് അഹമ്മദ് പറഞ്ഞു. എല്ലാ സൗകര്യങ്ങളും ഉള്ള മുറികളില് ബോയിയുടെ മേല് നോട്ടത്തിലാണ് പെണ് വാണിഭ കേന്ദ്രം പ്രവര്ത്തിക്കുന്നത്. കേന്ദ്രത്തിന്റെ മുഖ്യ നടത്തിപ്പുകാരനായ ഒരു മലയാളി ക്യാമറയും മറ്റും കണ്ടതോടെ അവിടെ നിന്ന് പതിയെ മുങ്ങി എന്നും ഫൈസല് പറയുന്നു.പെണ്വാണിഭ കേന്ദ്രത്തില് നിന്ന് രക്ഷപ്പെടുത്തിയ യുവതിയെ ഇപ്പോള് ദുബായ് ഇന്ത്യന് കോണ്സുലേറ്റിലെ അഭയ കേന്ദ്രത്തില് താമസിപ്പിച്ചിരിക്കുകയാണ്. അധികം വൈകാതെ തന്നെ ഇവരെ നാട്ടിലേക്ക് കയറ്റി വിടുമെന്ന് കോണ്സുലേറ്റ് അധികൃതര് വ്യക്തമാക്കി. ഇത്തരത്തില് ചതിയില് പ്പെട്ട് നിരവധി മലയാളി സ്ത്രീകള് ഇപ്പോഴും യു.എ.ഇ. യില് എത്തുന്നുണ്ട്. ഇന്ത്യ ഗവണ്മെന്റ് തന്നെയാണ് ഇത് തടയുവാന് വേണ്ട നടപടികള് സ്വീകരിക്കേണ്ടത്. ഫൈസല് ബിന് അഹമദിനൊപ്പം ഈ ഉദ്യമത്തില് ക്യാമറമാന് തന്വീറും, കെ. എം. സി. സി. നേതാവ് എബ്രാഹിം എളേറ്റിലും മറ്റു ചില പ്രവര്ത്തകരുമുണ്ടായിരുന്നു. Labels: കുറ്റകൃത്യം, ഗള്ഫ്, തട്ടിപ്പ്, പീഢനം, സ്ത്രീ
- ജെ. എസ്.
( Wednesday, September 17, 2008 ) |
0 Comments:
Post a Comment
Links to this post:
Create a Link
« ആദ്യ പേജിലേക്ക്